АҚШ Миллий разведка кенгаши ҳисоботида айтилишича, Бирлашган Араб Амирликлари (БАА) узоқ вақтдан бери АҚШ ташқи сиёсатини қулай йўналишга буришга уриниб келган. Бу ҳақда ҳужжат билан танишган уч манбага таяниб, Washington Post газетаси ёзмоқда.
Махфий ҳисоботда Қўшма Штатларнинг сиёсий тизимини манипуляция қилишга уринишлар тафсилотлари кўрсатилган. Ҳужжатда АҚШ ташқи сиёсатини БАА учун мақбул йўналишга йўналтиришнинг қонуний ва ноқонуний йўллари санаб ўтилган. Ҳисоботда тасвирланган бир қатор операциялар жосусликка ўхшайди, деб ёзади газета.
Масалан, БАА диссидентлар ва сиёсатчилар устидан жосуслик қилиш, АҚШдаги компьютерларни бузишга ёрдам бериш ва хакерлик технологиясини тақдим этиш учун АҚШ разведкасининг уч собиқ ходимини ёллаган, дейилади хабарда.
Вашингтон Пост газетасининг таъкидлашича, Амирликлар лоббичилар учун 154 миллион доллардан кўпроқ маблағ сарфлаган, БАА манфаатлари учун сиёсий ҳужжатларни ишлаб чиққан ташкилотларни қўллаб-қувватлашга эса юзлаб миллион сарфлаган.
Миллий разведка кенгаши — АҚШ разведка ҳамжамиятининг асосий таҳлил маркази. У миллий хавфсизлик масалаларини аниқлаш учун 18 та миллий разведка агентлиги маълумотларига таянади.
Изоҳ (0)