Чемпионлар тўқнашуви. Ислом Махачевнинг UFC’даги кейинги рақиби ва жанги санаси тасдиқланди

Енгил вазн тоифасида UFC чемпиони Ислом Махачев (23-1) навбатдаги жангини ярим енгил дивизион чемпиони Александр Волкановскига (25-1) қарши ўтказади. Бу ҳақда промоушен матбуот хизмати расман маълум қилди.

Россиялик ва австралиялик яккакурашчилар иштирокидаги жанг 12 февраль куни Австралияда бўлиб ўтадиган UFC 284 мусобақасининг асосий воқеасига айланади. Жанг енгил вазн тоифасида бўлиб ўтади.

Махачев 22 октябрь куни бўлиб ўтган жангда Чарльз Оливейрани мағлуб этиб, енгил вазн тоифаси камарига эга чиққанди.

Вазн тоифасида қатъи назар (P4P) рейтинги етакчиси Волкановски июль ойида Макс Ҳоллоуэйга қарши жангда камарини тўртинчи марта муваффақиятли ҳимоя қилганди.