2019 йил август ойида BAFTA мукофотига сазовор бўлган режиссёр Доминик Саваж «Мен борман» («I аm») номли ғайриоддий драматик сериал-антологияни суратга олди. Ундаги ҳар бир янги эпизод аслида қаҳрамон номи билан аталган алоҳида бадиий фильмдир. Илк қисмда Викки Макклюр «Мен Николайман», ундан кейин Саманта Мортон «Мен Кирстиман», Жемма Чан «Мен Ханнаман», Сюран Жонс «Мен Викторияман», Летиша Райт «Мен Даниелман» ва Лесли Менвил «Мен Мериман» фильмларида рол ўйнаган, деб ёзади Elle.
Навбат «Мен Рутман» фильмига етиб келди, режиссёр ўзининг ғайриоддий кастинги туфайли буни антологиянинг энг шов-шувли қисми бўлишни ваъда қилмоқда. Сериалнинг тўлиқ метражли эпизодида бош ролни сценарий муаллифи ҳамда «Оскар» мукофоти совриндори Кейт Уинслет ижро этади. Картинанинг марказида меҳрибон ва ғамхўр она ўсмир қизининг ижтимоий тармоқлар босими остида ўзидан узоқлашаётганига гувоҳ бўлади. Энг қизиғи шундаки, бу сафар қаҳрамоннинг қизи ролини унинг ҳақиқий қизи Миа Триплетон ўйнайди.
Драма замонамизнинг ёшларга таъсир этаётган руҳий саломатлик билан боғлиқ инқирози ҳақидаги ҳикоя сифатида таърифланади ва она ҳамда қиз ўртасидаги тобора кескинлашиб бораётган муносабатларнинг ҳақиқий ва ишончли тасвирини таклиф қилмоқда.
«Доминик Севаж бошчилигидаги ‘Мен борман’ фильмининг ҳар бир эпизодини яратиш ва суратга олишдаги ҳамкорлик ва сезгир ёндашуви ниҳоятда ҳаяжонли, — дейди Уинслет. — Актёрлар бутунлай унинг қаҳрамонларига айланади ва бу ерда ўзини кўрсатишга ўрин йўқ. Бундай иш муҳити ва унга тўлиқ шўнғиш учун ҳар қандай актёр кўп нарса беради. Қўлимни юрагимга қўйиб, ишонч билан айта оламанки, ушбу ҳикояни яратишда ўрганган нарсаларимизни ҳеч қачон унутмайман. Шунинг учун ҳам доимо ишлашга интиламан. Доминик Севаж билан ишлаш имтиёз ва илҳом манбайи. У шунчаки бошқаларга ўхшамайди».
Мавзуга доир:
Изоҳ (0)