«Барселона» ёзда Лионель Месси ёки Бернарду Сильвани олиб келмоқчи. Бунинг учун клуб катта ўзгаришлар қилишига тўғри келади

«Барселона» президенти Хоан Лапорта 2023 йилда Лионель Месси ёки Бернарду Сильва билан шартнома имзолашни хоҳламоқда.

Diario Sport нашрининг хабарига кўра, каталонияликлар раҳбарияти яна бир жаҳон даражасидаги юлдузни харид қилмоқчи. «Барселона» Чемпионлар Лигасидаги юришини тўхтатгандан сўнг раҳбарият таркибга тажрибали футболчилар кераклигини англаб етган. Уларнинг фикрича, таркибда ёш ва яхши футболчилар етарли, бироқ фақатгина Роберт Левандовски улардан ажралиб туради.

Шу сабабли «Барселона» ҳозирда «ПСЖ» шарафини ҳимоя қилаётган Лионель Мессини ортга қайтаришга ёки «Манчестер Сити» аъзоси Бернарду Сильва билан шартнома имзолашга ҳаракат қилади.

Бундай даражадаги футболчини қўлга киритиш учун «Барселона» кенг кўламли ишларни бажариши керак. Биринчидан, клуб учала сардор — Серхио Бускетс, Херард Пике ва Хорди Альба билан хайрлашиши лозим. Иккинчидан, «Барселона» қимматроқ футболчиларидан бирини сотиши лозим ва шу нуқтаи назардан яна эътибор Френки де Йонгга қаратилиши мумкин. Учинчидан, каталонияликлар либослар, финжон ва бошқа совғаларни сотишга масъул бўлган Barca Licensing and Merchandising (BLM) ҳуқуқларини сотиш орқали сўнгги молиявий дастакни фаоллаштириши мумкин.

«Барселона» Ла Лиганинг тақиқларига қўйилмасидан олдин, қишдаёқ Месси ёки Сильва билан шартнома имзолашни хоҳлаганди. Иқтисодий дастаклар фаоллаштирилгандан сўнг «кўк-анорранглилар»дан молиявий тўсиқлар олиб ташланди. Аввал «Барселона» Ла Лига томонидан қўйилган тўсиқ (1/4, яъни даромад қилинган 4 евронинг 1 евросини ишлатиш мумкин) асосида иш кўрган бўлса, ёздан буён жамоа 1/1 кўринишидаги (ҳар бир ишлаб топилган еврони сарфлаш мумкин) қоидага амал қилишни бошлади. 2023 йил ёзида «Барселона» яна 1/4 қоидасига қайтади.

Бироқ жамоа қишки трансфер ойнасида бундай трансферни амалга ошириш имконсизлигини англаб турибди.

Ёзда эса Мессининг «ПСЖ» билан шартномаси якунига етади, Бернарду эса «Манчестер Сити»дан кетиши мумкин. Шу сабабли «Барселона» ёзга молиявий тайёргарлик кўрмоқчи ва Месси ёки Сильва трансфери иложи бор бўлган молиявий ҳолатга эришишга ишонмоқда.

Жамоа январда Серхио Бускетснинг ўрнини босувчи ярим ҳимоячи ва ўнг қанот ҳимоячиси сотиб олиш истагида.