Туркманистон президенти Сердар Бердимуҳамедов агросаноат соҳасидаги ишлар муҳокамасига бағишланган ишчи видеоселектор йиғилиши чоғида мамлакатда пахта теримининг сустлигидан норозилигини билдирди. Бу ҳақда Central Asia хабар берди.
Жумладан, нашр қайд этишича, Бердимуҳамедов Ахал, Тошҳовуз, Лебап ва Мари вилоятларининг бир қатор этрапларида (туманларида) «оқ олтин» йиғиш суръати пастлигидан норози бўлиб, бу вилоятлар раҳбарлари олдига пахта теримини тезлаштириш талабини қўйди.
Туркманистон раҳбари халқ хўжалиги учун қимматли хом ашё бўлган пахта ҳосилини нобуд бўлмасдан йиғиштириб олиш бўйича зудлик билан чора-тадбирлар кўриш зарурлигини таъкидлади.
Шу билан бирга, қишлоқ хўжалиги техникалари, пахта қабул қилиш пунктлари, пахта тозалаш корхоналарининг узлуксиз ишлашини таъминлаш, фермерларнинг самарали меҳнат қилиши учун шарт-шароит яратиш муҳим аҳамиятга эга, — дея Бердимуҳамедовнинг сўзларини келтиради нашр.Шунингдек, президент Мари вилояти ҳокими ўринбосари Агаджан Бекмиродовни «ишдаги жиддий камчиликлари учун» ишдан бўшатиш тўғрисидаги қарорни имзолади.
Туркманистонда пахта йиғим-терим кампанияси сентябрь ойининг биринчи ўн кунлигида бошланган, бу йил 1 миллион 200 минг тонна «оқ олтин» йиғиш режалаштирилган.
2022 йилда пахта учун 580 минг гектар майдон ажратилган, бу ўтган йилларга нисбатан 40 минг гектарга кам. Бўшатилган майдонлар картошка ва бошқа сабзавот экинлари учун ажратилган.
Шу билан бирга, пахта теримига давлат буюртмаси 2021 йилдаги даражада сақланиб қолди — ўтган йили 1,25 миллион тонна эди. Маҳсулдорликни ошириш ҳисобига бу режага эришиш кутилганди.
Изоҳ (0)