Прогнозлаштириш ва макроиқтисодий тадқиқотлар университети озиқ-овқат чиқиндилари ва қандай қилиб унинг олдини олиш ҳақида маълумот берди.
Бирлашган Миллатлар Ташкилотининг Атроф-муҳит дастури (UNEP) ҳисоб-китобларига кўра:
- глобал иссиқхона газлари чиқиндиларининг 8-10 фоизи истеъмол қилинмай қолган озиқ-овқатлар билан боғлиқ;
- 2019 йилда дунё бўйлаб ишлаб чиқарилган озиқ-овқатнинг 17 фоизи чиқиндига айланган. Бу тахминан 931 миллион тонна озиқ-овқатга тенг.
FAO ҳисоб-китобларига кўра:
Ҳар йили ташлаб юбориладиган озиқ-овқат маҳсулотларини ишлаб чиқариш учун ишлатиладиган сувнинг умумий ҳажмини (250 км3) Волга дарёсининг йиллик оқими ёки Женева кўлининг уч баравар ҳажми билан солиштириш мумкин.
Озиқ-овқат чиқиндиларининг «углерод изи» 3,3 миллиард тонна карбонат ангидридни ташкил этади, бу атмосферага чиқарилаётган иссиқхона газларининг йиллик ҳажмига тенг.
Озиқ-овқат чиқиндиларидан (балиқ ва денгиз маҳсулотларидан ташқари) тўғридан-тўғри иқтисодий йўқотишлар йилига 750 миллиард долларга етади.
Яқинлашиб келаётган байрам кунларида қандай қилиб озиқ-овқат исрофгарчилигининг олдини олиш мумкин?
Истеъмол қилинмаган озиқ-овқатларни кимга бериш мумкинлигини олдиндан ўйлаб кўриш зарур.
Вазиятни ҳолисона баҳолаб, харидлар рўйхатини тузаётганда, қанча ва қандай маҳсулотларни сотиб олишни олдиндан ўйлаб кўриш ва агар уйга 5 киши ташриф буюрадиган бўлса, 50 кишига мўлжаллаб дастурхон безамаслик тавсия этилади.
Озиқ-овқат маҳсулотларини тўғри сақлаш — харид вақтида унинг тўғри сақланишини таъминлаш керак.
Уйга ташриф буюрган меҳмонларга овқатни ўзлари солиб олишларига қўйиб бериш — меҳмонлар овқатни ўзлари солиб олсин, шунда улар айнан ўзлари истеъмол қилишни хоҳлаётган миқдорда олади.
Изоҳ (0)