Фарғона ва Тошкент вилоятларида жиноят ишларини ижобий ҳал қилиб беришни ваъда қилган шахслар ушланди. Бу ҳақда Иқтисодий жиноятларга қарши курашиш департаменти хабар бермоқда.
Таъкидланишича, Бош прокуратура ҳузуридаги департаментнинг Фарғона вилояти бошқармаси томонидан ИИБ ходимлари билан ҳамкорликда тезкор тадбир ўтказилган. Унда фуқаролар Д.Қ. ва М.Ж. ўзаро тил бириктириб, фуқаро Д.нинг ишончига кириб, унинг таниши Р.ни гўёки юқори лавозимда ишловчи танишлари ёрдамида тергов ҳибсхонасидан чиқариб, унга нисбатан қўзғатилган жиноят ишини ижобий ҳал қилиб беришни ваъда қилиб, эвазига 10 минг доллар олган вақтда ашёвий далиллар билан ушланган.
Шу каби, департаментнинг Зангиота тумани бўлими томонидан ИИБ ходимлари билан ҳамкорликда ўтказилган тезкор тадбирда фуқаро Б.Н. фуқаро С.нинг ишончига кириб, унинг тумандаги тергов ҳибсхонасида сақланаётган отасини 5 минг доллар эвазига танишлари орқали муддатидан илгари жазодан озод қилиб беришни ваъда қилиб, олдиндан 35 миллион сўмни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)