Жаҳон банки дунё 2030 йилга бориб ўта қашшоқликни бартараф эта олмаслигини айтди. Бу ҳақда «Дарё»га Жаҳон банки ҳисоботидан маълум бўлди.
- Фото: Bloomberg
Банкнинг прогнозларига кўра, бу вақтга келиб дунё аҳолисининг деярли 7 фоизи ниҳоятда қашшоқликда яшайди.
Камбағалликка қарши курашни COVID-19 пандемияси, Украинадаги уруш ва озиқ-овқат нархининг юқорилиги секинлаштирди.
Жаҳон банки ўз ҳисоботида 2030 йилга бориб ўта қашшоқликни 3 фоизга камайтириш мақсадига ҳозирча эришиб бўлмайди, деган хулосага келди.
Пандемия, Россия ва Украинада ўртасидаги уруш ва озиқ-овқат маҳсулотларининг юқори нархлари туфайли 2030 йилда дунёда камбағаллар деярли 7 фоизни (тахминан 574 миллион киши) ташкил қилади.
Ҳисоботда айтилишича, пандемия бошланган 2020 йилда 70 миллион одам ўта қашшоқликка тушиб қолган, бу 1990 йилда мониторинг бошланганидан бери энг катта кўрсаткичдир.
Ташкилот қашшоқликни пасайтириш суръати давом этмаганда, 2022 йил охиригача жами 685 миллион киши ўта қашшоқлик даражасига тушиб қолиши мумкинлигини таъкидлади.
- Фото: Bloomberg
Жаҳон банки, шунингдек, қашшоқлик чегараси эндиликда кунига 2,15 долларни ташкил этишини таъкидлади.
Биз инфляция, валюта курсларининг қадрсизланиши ва ривожланиш йўлида турган бир-бирига зид бўлган инқирозлар оқибатида ҳаддан ташқари қашшоқликнинг ўсиши ва умумий фаровонликнинг пасайишидан хавотирдамиз, — деди Жаҳон банки президенти Дэвид Малпас Bloomberg агентлигига.
Унинг айтишича, валюта барқарорлигини мустаҳкамлаш, инфляцияни пасайтириш ва ўртача даромад ўсишини тиклаш учун макроиқтисодий сиёсатга тузатишлар киритиш керак.
Қашшоқлик ва тенгсизликка қарши курашиш учун Жаҳон банки ижтимоий ҳимояга муҳтож ва кам таъминланган фуқароларни манзилли қўллаб-қувватлашни жорий этишни таклиф қилди.
Бироқ, субсидиялардан қочиш керак, чунки улар нархларни бузади ва истиқболда салбий таъсир кўрсатади, — дейди Жаҳон банки.
Аввалроқ Жаҳон банки Ўзбекистон иқтисодиёти 2022 йилда 5,3 фоизга ўсишини прогноз қилган эди.
Изоҳ (0)