Бухорода фуқаро 220 минг рублни сўмга ноқонуний айирбошлаётганда қўлга тушди

Ўзбекистоннинг бир қатор ҳудудларида валюта қимматликларининг ноқонуний муомалага киритилишининг олди олинди.

Бош прокуратура ҳузуридаги департаментнинг Хоразм вилоятининг Янгибозор тумани бўлими томонидан ўтказилган тезкор тадбирда, Боғот тумани деҳқон бозори атрофида валюта айирбошлаш билан шуғулланиб келган Х.О. фуқаро М.га 4 200 АҚШ долларини 46,6 миллион сўмга сотган вақтида ашёвий далиллар билан ушланган.

Департаментнинг Тошкент вилоятининг Бекобод шаҳар бўлими томонидан ўтказилган тезкор тадбирда, шаҳар деҳқон бозори атрофида валюта айирбошлаш билан шуғулланиб келган (муқаддам Жиноят кодексининг 177-моддаси билан судланган) А.Р. фуқаро Р.га 3 550 АҚШ долларини 39,4 миллион сўмга сотган вақтида ашёвий далиллар билан ушланган.

Шу каби, Департаментнинг Бухоро вилоят бошқармаси томонидан ИИБ ходимлари билан ҳамкорликда ўтказилган тезкор тадбирда, Бухоро шаҳар савдо мажмуаси атрофида валюта айирбошлаш билан шуғулланган (муқаддам Жиноят кодексининг 177-моддаси билан судланган) У.Я. фуқаро Д.га 220 минг Россия рублини 38,5 миллион сўмга сотган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда.