Ижтимоий тармоқларда «Самарқанд шаҳрида соғлом арчалар кесиб кетилмоқда!» мазмунида хабар тарқалганди. Давлат экология қўмитаси матбуот хизмати ҳолат юзасидан маълумот берди.
Таъкидланишича, ҳолат бўйича ўтказилган ўрганишлар давомида «Самарқанд автотеххизмат» МЧЖ биноси рўпарасида йўл таъмирлаш ишлари олиб бориш жараёнида 5 туп элдор қарағайи дарахти фуқаро А.Л. томонидан ноқонуний равишда кесиб олиб кетилгани аниқланган. Ушбу фуқаро бошқарувидаги автотранспорт воситаси эса «Самарқанд автотеххизмат» МЧЖга тегишли экани маълум бўлган.
Бироқ МЖЧ масъуллари бу ҳуқуқбузарлик ҳолатидан бехабар экани, ҳуқуқбузарлик ҳолати фуқаро А.Л. томонидан содир этилганини маълум қилган.
Мазкур ҳолат юзасидан фуқарога нисбатан тегишли тартибда Маъмурий жавобгарлик тўғрисидаги кодекснинг 79-моддаси 1-қисми (ўсимлик дунёси объектларини йиғиш, тайёрлаш ва улардан фойдаланиш тартиби ҳамда шартларини бузиш)га мувофиқ маъмурий жарима ҳамда 86,4 миллион сўм миқдорида ўсимлик дунёсига етказилган зарар бўйича даъво белгиланди. Ҳозирда ҳужжатлар суд органларига тақдим этиш учун тайёрланмоқда.
Изоҳ (0)