Клиплари YouTube’да миллионлаб томоша қилинадиган таниқли хонанда Жаноб Расул «Дарё» интернет нашри учун эксклюзив интервью берди. Суҳбат давомида у болалиги, ота-онаси ва гуруҳда бири икки бўлмагач якка ижод қилишни истагани ҳақида гапирди.
— Болалигим у қадар қизиқ кечмаган. Ҳамма қатори оддий бола бўлганман. Балиқ тутишни ва антенаси узун радиода қўшиқ тинглашни яхши кўрардим. Уни қулоғимга қўйиб, бир соатда бир бериладиган қўшиқни кутиб ўтирардим. Унгача бир аёл тинмай гапирарди. «Қачон тугар экан?» деб мен ҳам уни эшитиб ўтираверардим. Болалигимда ҳиндча қўшиқларни яхши кўрардим. Мактабда ўқидим, ундан кейин коллежга ўқишга кирдим. Шу билан катта бўлиб қолганимни билмай қолдим. Баъзиларнинг болалигига ўхшаб, меники унчалик қизиқарли бўлмаган.
Оилавий шароит ва онамнинг хоҳиши билан 13 ёшимдан тўйларга чиққанман. Санъаткорлар чой ичиб дам олишаётган пайтда «Микрофонда овозим қандай чиқар экан?» деб бақириб таёқ еган пайтларим ҳам бўлган.
Жаноб Расул болаликдан пул топишга қизиққани ва онасининг интилиши сабаб хонанда бўлгани ҳақида сўзлаб берди.
— Ҳақиқатан ҳам болаликдан пул топишга қизиққанман. Онам яхши яшашга интилган. Шу боис «Ўғлимнинг овози бор, яхши санъаткор бўлса кўп пул топади», деб «Севинч» гуруҳида қўшиқ айтишимни истаган. Бу гапим билан оилам моддий жиҳатдан қийналган, шунинг учун пул топишга қизиққанман дея олмайман. Дадам раҳматли еб-ичишни яхши кўргани учун уй солиб, машина олмаса ҳам рўзғоримиз бут бўларди. Ҳар куни ишдан гўшт ва шоколад билан кириб келарди. У яхши овқатлар қилинишини, дастурхонимиз тўлиб туришини истарди, — дейди хонанда.
Отасининг вафотидан аввал уни кўп койигани ва энди эса уни соғинаётгани ҳақида
— Дадам раҳматлидан икки йил аввал айрилдик. У қандли диабет касаллиги билан оғрир эди. Бу касалликка чалинганлар мунтазам парҳез қилиши керак. Аммо дадам парҳезга риоя қилмади. Ҳатто, ҳазиллашиб ‘Дада диета қилмасангиз ўласиз’, деб видеога олганимда ‘Ўлсам мени эслаб қўйсанг бўлди’, деб кулиб қўйганди. Дадамнинг вафотидан кейин ҳеч бир ишимдан ҳаловат топаётганим, қувонаётганим йўқ. Уй-қуришим ҳам дадам билан қизиқ экан. Дадамсиз ҳаммаси оддийдек туюляпти, — дейди хонанда Жаноб Расул.
Жаноб Расул «Севинч» номли кичик гуруҳда қўшиқ айтишни бошлагани ва у ерда келажагини кўрмагани учун яккахон ижодни бошлагани ҳақида
— Онамнинг хоҳиши билан «Севинч» номли гуруҳда қўшиқ айтишни бошлаганман. Устозимдан жуда кўп нарсаларни ўргандим. Аммо гуруҳ таркибида ижод қилиб, келажагимни кўрмадим. Шундан кейин устозимнинг розилиги билан яккахон ижод қилишни бошладим. Аммо 5 йил ташкилий ва молиявий жиҳатдан жуда қийналдим.
Гуруҳ билан ишлаш қийин. Энг катта келишмовчилик пулдан келиб чиқади. Энг аҳил гуруҳлар ҳам кун келиб, пул сабаб ажралади. Бир пайтлар «Уммон» гуруҳидаги Жасурга шу ҳақида айтганимда «Йўқ, биз аввалдан бир-биримизни таниймиз, бизда ҳеч қандай келишмовчилик бўлмайди», деганди. Орадан ҳеч қанча вақт ўтмай Шоҳруҳ уйланди. Кейин гуруҳ ҳақида гап-сўзлар тарқалди. Чунки учта қўчқорнинг боши бир қозонда қайнамайди, — дейди хонанда Жаноб Расул.
Мавзуга доир:
Изоҳ (0)