Сурхондарё вилояти Бойсун туманидаги фермер хўжалигида 17 туп арча ва кўктерак кесиб ташланди. Бу ҳақда Давлат экология қўмитаси хабар берди.
Қайд этилишича, вилоят Экология ва атроф-муҳитни муҳофаза қилиш бошқармасига телефон қўнғироғи орқали Бойсун туманидаги «Деҳибола» маҳалласи ҳудудида арча ва кўктерак дарахтларининг кесилгани бўйича мурожаат қилинган. Ушбу мурожаатга асосан вилоят Экология ҳамда Миллий гвардия бошқармалари ходимлари ҳамкорлигида тезкор ишчи гуруҳ тузилиб, айтилган манзилга етиб борилган.
Ўрганиш давомида шу манзилда фаолият юритиб келаётган «Н.Ҳ» фермер хўжалиги бошлиғи Н.А. хабардорлигида ва фермер хўжалиги иш юритувчиси Н.К. иштирокида кўздан кечирилганда фермер хўжалигига бириктирилган тоғли ҳудудда ўсувчанлигини йўқотмаган 10 туп Зарафшон арча, 7 туп кўктерак дарахти таг қисмидан кесилгани аниқланди.
Дарахтларнинг кесилиши оқибатида «Ўсимлик дунёсини муҳофаза қилиш ва ундан фойдаланиш тўғрисида»ги қонуннинг 37-моддаси талаби бузилган. Ушбу ҳаракат туфайли қонун бузилишига йўл қўйилиши билан бир вақтда ўсимлик дунёсига ҳам зарар етказилган.
Ишчи гуруҳ томонидан ўсимлик дунёсига етказилган зарар ўрганилганда 105 000 000 (бир юз беш миллион) сўмни ташкил этди ва ушбу зарар «Н.Х» фермер хўжалигига ҳисобланди.
Мурожаат ҳар тарафлама ўрганилгач, жавобгарлик масаласини ҳал этиш ва етказилган зарарни ундириш ва айбдорларга нисбатан қонунда белгиланган тартибда чора кўриш учун тўпланган ҳужжатлар суд органларига ўтказилмоқда.
Изоҳ (0)