Ўзбекистондаги қабристонларда қабрлар атрофини қабрлар атрофини металл ва бошқа тўсиқлар (ўсимликлардан иборат яшил тўсиқлардан ташқари) билан ўраб олиш тақиқланиши мумкин. Бу ҳақда Вазирлар Маҳкамасининг қарор лойиҳасида кўзда тутилган.
Унга кўра, ҳукуматнинг 2011 йил 4 апрелдаги Дафн этиш жойларини сақлаш, улардан фойдаланиш ва қабр усти ёдгорликларини ўрнатиш тартиби тўғрисидаги низомга тегишли ўзгартириш ва қўшимчалар киритиш режалаштирилмоқда.
Ушбу низомнинг 13-банди йигирманчи хатбоши билан тўлдирилади. Яъни, мазкур ҳужжат лойиҳаси амалиётга татбиқ этилган тақдирда ҳудудий ободонлаштириш бошқармалари ва қабристонларнинг маъмурияти «профилактика инспекторлари билан биргаликда қабрлар атрофини металл ва бошқа тўсиқлар (ўсимликлардан иборат яшил тўсиқлардан ташқари) билан ўраб олинишининг олдини олиш ҳамда аниқланган ушбу ҳолатларни дарҳол бартараф этиш, шунингдек, қўшни қабрлар ҳудудларини ва бўш ер участкаларини ўзбошимчалик билан эгаллаб олинишига йўл қўймаслик чораларини кўради».
Шунингдек, ушбу низомнинг 15-бандига киритилаётган ўзгартиришга кўра, «янги қабристонларни барпо этиш Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимларининг ер тўғрисидаги қонунчиликка мувофиқ қабристонлар ташкил этиш учун ер участкаси ажратиш тўғрисида қабул қилинган қарорига асосан туман (шаҳар) ҳокимликларининг қарори билан амалга оширилади».
Бундан ташқари 36-банднинг биринчи хатбошиси қуйидаги таҳрирда баён этилади: «Дафн этишга рухсатни қабристон мудири (назоратчиси) фақат тиббиёт муассасаси томонидан белгиланган тартибда расмийлаштирилган ўлим ҳақидаги маълумотнома ёки фуқаролик ҳолати далолатномаларини қайд этиш органлари томонидан берилган, ўлим тўғрисида белгиланган шаклдаги тегишли ҳужжатлар тақдим этилганидан кейингина беради».
Ушбу қарор лойиҳаси муҳокамаси 1 октябрга қадар давом этади.
Изоҳ (0)