Наманганлик талаба ўзи ўқийдиган институтга қуёш панелли ёритгичларни ўрнатди. Бу ҳақда «Дарё» мухбири Азизбек Абдувалиев хабар бермоқда.
Муҳаммадюсуф Сотимбоев Наманган муҳандислик-қурилиш институти Қурилиш факультетининг учинчи босқичида таҳсил олади. Ўзининг айтишича, бу ғоя бундан анча аввал, Хитойга борганида уйғонган.
«Хитойда кўчаларнинг аксарият қисми шундай ёритгичлар ёрдамида ёритилишини кўрган ва ҳавас қилгандим. Президент томонидан мамлакатда муқобил энергияни кенг жорий этиш бўйича вазифалар белгилаб берилгани, қарорлар қабул қилингани шу ҳавасни ҳаракатга айлантирди. Қолаверса, институтимизда ўтилган муқобил энергетика бўйича дарслар, устозимиз профессор Алишер Алиназаровнинг ўгитлари қўл келди», — дейди талаба.
Қурилма қуёш панели, батареялар ва ёритгичдан иборат. Бир марта тўлиқ қувватланиб олгач, беш-олти кун бемалол ишлаши мумкин. Кечки пайт қоронғи тушиши билан автоматик тарзда нур сочишни бошлайди. Бундай ёритгичларнинг кўпайтирилиши электр энергиясини бошқа зарур жойларга йўналтириш ва трансформаторларга тушадиган зўриқишни олдини олишга ёрдам беради.
Муҳаммадюсуфнинг айтишича, ёритгичларнинг тайёрлаш жараёнида уларни маҳаллий шароитга мослаштириш учун анча саъй-ҳаракат қилган ва дастлабки уринишлари муваффақиятсиз чиққан. Бироқ талаба ортга чекингани йўқ ва янги ўқув йили арафасида институтнинг кириш қисмида у томонидан тайёрланган ҳар бири қарийб 10 метрли иккита қуёш панелли ёритгичлар қад ростлади.
«Эндиги режам шамол энергияси ёрдамида ишловчи шундай кичик қурилмалар тайёрлаш. Ҳозир устозим билан шу лойиҳа устида иш олиб боряпмиз. Агар мутасаддилар маъқул кўришса, Наманган халқаро аэропортига олиб борувчи йўлга қуёш ва шамол энергияси ёрдамида ишловчи ёритгичлар ўрнатиш ниятидаман. Бу ҳам бўлса энергияни тежаш ва ички туризмни ривожлантиришга қўшган ҳиссам бўлар эди», — дейди Муҳаммадюсуф Сотимбоев.
Мавзуга доир:
Ўзбекистонда қуёш ва шамол электр станцияларини харид қилганлик учун компенсация тўланади
Ўзбекистон ва шамол энергияси: у қандай ишлайди, нега мамлакат ҳозироқ унга ўтиши зарур?
Изоҳ (0)