Буюк Британиянинг марҳум қироличаси Елизавета II билан видолашиш истагида бўлганларнинг навбат кутиш вақти Лондон вақти билан 17 сентябрь 8:00 (Тошкент вақти билан 12:00) ҳолатига 24 соатдан ошди, деб ёзади Meduza Буюк Британия ҳукуматининг Рақамли технологиялар, маданият, матбуот ва спорт департаментига таяниб.
Аммо бу рекорд эмас: 17 сентябрь тунги 1 ларда кутиш вақти 25 соатдан ҳам ошиб кетганди. Шу куни эрталаб 10:00 да эса 16 соатгача қисқарди.
Шу пайтга қадар Елизавета II нинг тобути ёнига неча киши келиб-кетгани аниқ эмас, бироқ гап минглаб одамлар ҳақида бормоқда. Аввалроқ Лондон маъмурияти Елизавета II билан видолашиш истагидагилар сони бир миллион кишига етишини, навбатда кутиш вақти эса 35 соатдан ошишини прогноз қилганди.
Буюк Британия қироличаси Елизавета II 8 сентябрь куни 96 ёшида вафот этди. У мамлакатни 70 йил давомида бошқарди.
Қиролича ўзининг Шотландиядаги Балморал қасрида ҳаётдан кўз юмди. Унинг жасади Лондонга 15 сентябрь куни келтирилди ва Вестминстер саройига жойлаштирилди, хоҳловчилар қиролича билан видолашиши мумкин.
Елизавета II нинг тобути Вестминстерда 19 сентябргача қолади. Қиролича шу куни Вестминстер аббатлигида дафн қилинади.
Мавзуга доир:
- Қиролича Елизавета II ўзи амал қилган ва бутун дунёга ўргатиб кетган 5 та тавсия
- Япония императори рафиқаси билан Елизавета II нинг дафн маросимида иштирок этади
- Қиролича Елизавета II нинг дафн маросимига Россия, Беларусь ва Мьянма вакиллари таклиф қилинмади
- Дунёдаги миллионлаб инсонларнинг қалбини забт эта олган қиролича Елизавета II қандай инсон эди? (фото)
Изоҳ (0)