15 сентябрь куни «Ўзбекистон» анжуманлар саройида «Ипак йўли дурдонаси» XIV Тошкент халқаро кинофестивали доирасида «Туркия киноси кунлари»нинг очилиш маросими ҳамда кино ижодкорлар иштирокида ижодий кеча бўлиб ўтди. «Дарё» мухбирлари мазкур кечада иштирок этиб, фото ва видеорепортаж тайёрлашди.
Турк киносини қадрловчи минглаб ўзбек томошабинлари тадбир бошланишидан анча аввалроқ «Ўзбекистон» анжуманлар саройида қаршисида тўпланишди.
Кириш йўлаклари ана шундай қизил гиламлар ва ранг-баранг чироқлар билан безатилди.
Тадбирда киноюлдузлар, таниқли режиссёрлар, ўзбек санъати вакиллари, турк киноси мухлислари ҳамда ОАВ вакиллари иштирок этди.
Тадбир давомида Ўзбекистон Кинематография агентлиги раҳбари Фирдавс Абдухолиқов сўзга чиқди. Унинг қайд этишича, фестиваль давомида намойиш этиладиган фильмларнинг 3 таси турк киносидир. Келгусида ҳам турк киноси вакиллари билан ҳамкорлик изчил давом этади.
Бурак Ўзчивитнинг навбатдаги ташрифи ҳам шовқин-суронли бўлди. Яъни уни бу гал ҳам мухлислари хотиржамликда қарши олишмади.
Ўзбек актрисалари туркиялик ҳамкасблари билан учрашувни тарихга муҳрлашди.
Кеча «Дарё» камералари нишонига тушмаган актриса Райҳон Уласенова «Турк кино кунлари»нинг очилиш маросимига катта қизи ва ҳамкасби Ситора Фармонова билан бирга ташриф буюрди.
Зал томошабинлар билан тўлди.
Саҳнага турк киноюлдузлари Мустафо Уғур Яғчиоғлу, Пинар Язчиоғлу, Назиф Тунч, Мурад Айдин, Азра Акин, Гизем Лидия Денизчи, Севдар Гоўкхан, Челал Ал, Туба Унсул, Нургул Ешилчай, Бурак Ўзчивит саҳнага таклиф этилди.
Бурак Ўзчивит «Севги изтироби»даги рақиби Амирни ўзбекчада гапиртирган актёр Алишер Узоқов билан саҳнага чиқди.
Тадбир давомида томошабинлар ва турк киноси вакиллари ўртасида эркин мулоқот ташкил этилди.
Алишер Узоқов ва Бурак Ўзчивит кичик саҳна кўринишини жонлантиришди. Бу чиқиш икки миллат томошабинларига хуш кайфият улашди.
Нургул Ешилчай саҳнадаги ўриндиқда ўзини қироличадек ҳис қилаётганини ва унга фақатгина тож етишмаётганини айтиб, ҳазил қилди. Табдирга бошловчилик қилган актриса Шаҳзода Муҳаммедова унга бошидаги бежирим тожни туҳфа этди.
Нургул Ешилчай ҳам мухлислари билан эркин мулоқотга киришиб, уларни қизиқтирган бир нечта саволларга жавоб берди.
Ёқимтой блогер Эрали тадбирда синглиси билан ташриф буюрди. У синглисига Бурак Ўзчивит билан учрашиш ва унга қўшиқ куйлаб бериш бахтини туҳфа этди.
Актриса Барчин Ғофурова турк киносининг шайдоси эмаслиги ва Бурак Ўзчивитни унчалик ёқтирмаслигини айтиб ўтди.
«Турк кино кунлари»нинг очилиш маросимига бир гуруҳ санъаткорлар ҳам ташриф буюришди. Улар «Дарё» мухбири билан фестиваль таассуротларини ўртоқлашишди.
Афсуски, турк киноижодкорлари ўртасидаги бирозгина тушунмовчилик тадбир файзига ҳам ўз таъсирини ўтказмай қолмади. Журналист ва тадбир ташкилотчиси бўлган Шоира Рауфбоева ўзининг Facebook’даги саҳифасига турк киноижодкорлари ўртасида рўй берган совуқ вазият, ўзбек ижодкорларига ўрнак бўлиши кераклиги ҳақида ёзиб қолдирди:
Туркиядан ташриф буюрган 9 та актёр саҳнага чиқиб, томошабинлар билан юзма-юз бўлишди. Лекин ўзбек «буракшунослари» ва Яшилчой мухлислари тадбирни ярмини уларни кутиб, кўчада ўтказишгани, бошловчилар икки қайта тантана билан эълон қилишса-да, улар саҳнага чиқмади. Ва ниҳоят Нургул Ешилчай саҳнани бир бурчагидан чиқиб, ўша ерда қотди. Ҳамюрт ҳамкасбларига назар ташлади-ю, икки қўлини чўнтагига солиб, ғоз туриб олди. Узатилган микрофонни ҳам қўлига олишни эп кўрмай, бошловчининг қўлидаги микрофонга эгилиб, «Салом, яхшимисизлар?» деб бошқа актёрлар ёнига бориб ўтирмасдан, саҳна ортига ўтиб кетди. Ойбек Вейсал ўғли тўққизта актёр билан бирма-бир самимий суҳбат қилди, лекин Яшилчой қайтмади. Бурак-ку умуман кўринмади.Тўлиқ репортажни қуйида томоша қилишингиз мумкин.Кўнглимнинг бир чеккасидан «У шунчалик машҳурмикан, тўққизта ҳамкасбини менсимади-я», деган фикр ўтди. Саҳнадагиларни совға-саломлар билан ўринларига кузатиб қўйишгачгина Нургул саҳнага чиқиб келди ва унинг бошига бошловчининг тожини кийдириб, энди шоу бошланаётган эди, 58 йилдан бери кино санъатига ҳалол хизмат қилиб, сочи оқарган, ўзининг таъбирича «подшодан қулгача» барча ролларни ўйнаган Севдар Гўкхан саҳнага отилиб чиқиб, «Томошамизни бузди деб мендан хафа бўлманг. Минг афсус, мана бу оёғи ердан узилган икки ҳамкасбимиз саҳнада биз билан бирга ўтиришдан ор қилди, аслида улар бизнинг сафимизда бўлишга нолойиқ. Сиз одамнинг қиёфасига қараб баҳо берманг, унинг кимлигини хатти-ҳаракатлари билдириб туради. Биз ортиқ бу иккисининг аҳмоқона томошасини кўриб, ҳақоратни жимгина ютиб кета олмаймиз. Биз бу ерни ҳозироқ тарк этамиз», — деб тўққиз турк ижодкори билан зални тарк этишди. Уларнинг ортидан элчихона вакиллари ҳам чиқиб кетишди ва шу билан бугунги тадбирнинг файзини ҳам олиб кетишди.
Изоҳ (0)