Осиё мамлакатлари Россия кўмиридан воз кечмоқда

Жанубий Корея, Япония ва Тайван аста-секин Россия кўмиридан воз кечмоқда, аммо ҳозирча буни тўлиқ амалга ошириш қийин бўляпти. Бу ҳақда «Коммерсантъ» хабар бермоқда.

Япония ва Тайван етказиб беришни энг тез қисқартирмоқда. Таҳлилчиларнинг фикрига кўра, бу мамлакатлар Россия кўмирини юқорироқ нархда бўлса ҳам, Австралия кўмири билан алмаштириши мумкин.

Божхона статистик маълумотларига кўра, Москвага дўстона муносабатда бўлмаган давлатлар қаторига киритилган Жанубий Корея, Япония ва Тайван Россиядан кўмир сотиб олишни камайтирмоқда. 

Жорий йилнинг дастлабки етти ойи натижаларига кўра, Жанубий Корея 12,8 миллион тонна Россия кўмирини импорт қилди, бу ўтган йилнинг шу даврига нисбатан 3 фоизга кам. 

Япония 8,4 миллион тонна кўмир импорт қилди — ўтган йилга нисбатан 25 фоизга кам. Тайван Россиядан кўмир сотиб олишни 33,3 фоизга, 4,4 миллион тоннагача камайтирди.

Украинадаги қуролли можаролар, санкциялар ва Россия энергия ресурсларини сотиб олишдан бош тортишдан аввал, бу мамлакатлар Россиянинг кўмир компаниялари учун энг истиқболли бозорлардан бири эди. 

Мавзуга доир: Fitch: Юқори кўмир нархлари узоқ вақт сақланиб қолади

Россия кўмир саноатини ривожлантириш стратегиясига кўра, мамлакат Шарқий Осиёга етказиб беришни 2018 йилдаги 84 миллион тоннадан 2035 йилга келиб 123 миллион тоннагача оширишни кутган эди. 

Таъминотнинг энг катта ўсиши Хитой, Ҳиндистон, Япония, Жанубий Корея ва Вьетнамга бўлиши керак эди. 

Япония апрель ойида Россиядан кўмир импортини босқичма-босқич қисқартириш ва кейин уни бутунлай тақиқлаш ниятида эканини маълум қилганди. 

2021 йилда Япония умумий кўмир импортининг 11 фоизи Россия ҳиссасига тўғри келган. Россиядан кўмирнинг 7 фоизини сотиб олган Япониянинг Кюшу Electric Power энергетика компанияси аллақачон сотиб олишдан бош тортаётганини эълон қилган. 

2021 йилда Россия кўмиридан импорт қилинадиган умумий кўмирнинг тўртдан уч қисмини ташкил этган Жанубий Корея Россияга қарамликни камайтириш мақсадида Австралиядан етказиб беришни 1,5 баробарга оширишни режалаштирмоқда. 

Yonhap агентлиги маълумотларига кўра, 2022 йилнинг биринчи чорагида Россия кўмири Жанубий Корея умумий кўмир импортининг қарийб 62 фоизини, Австралия кўмири эса 38 фоизни ташкил этган. 

Тайваннинг Taipower давлат энергетика компанияси Россия кўмири учун якуний тўловни амалга оширган ва янги битимлар тузиш ниятида эмас.

Аввалроқ Европа Иттифоқи Россия кўмирини сотиб олишни бутунлай тўхтатган эди.