Ўзбекистоннинг Қоҳирадаги элчихонаси ва мамлакатнинг Вирусология илмий текшириш институти томонидан олиб борилган музокаралар натижасида Миср ҳукумати томонидан Ўзбекистон халқига гепатит C вирусига қарши 30 минг дона дори воситаси беғараз тақдим қилинди, деб хабар бермоқда «Дунё».
Инсонпарварлик кўмаги таркибини умумий қиймати 300 минг доллардан ортиқ бўлган 15 минг дона «Софосбувир» ва 15 минг дона «Даклатасвир» дори воситалари ташкил қилди. Ушбу дори воситалари, энг аввало, Оролбўйи минтақаси, шунингдек, Қашқадарё, Наманган, Тошкент вилоятлари ва мамлакатнинг бошқа ҳудудларида истиқомат қилаётган, гепатит C вирусига чалинган беморлар эҳтиёжи учун етказилиши режалаштирилмоқда. Дорилар Вирусология илмий текшириш институтининг масъул ходимлари томонидан тақсимланади.
Гепатит C — «мулойим қотил» деб таъриф бериладиган ушбу касаллик тури кўпинча жигар сиррози ёки саратонига сабаб бўлиши мумкин. Касаллик, асосан, қон орқали, яъни эҳтиётсизлик сабаб стоматолог, маникюр ва бошқа амалиётларда қон тегган буюмдан бошқа бир инсонга юқиши мумкин. Шунингдек, тиш чўткаси ёки соқол оладиган ускуна ҳам вирус юқиши учун сабаб бўлади.
Мавзуга доир: «Мулойим қотил», «кир қўллар касаллиги». Гепатит қандай юқади ва унинг турлари ҳақида нималарни билиш керак?
Изоҳ (0)