Сўнгги кунларда Instagram тармоғида кўплаб ўзбек санъаткорлари «Менинг тўйим» номли мусиқий фильмда суратга тушаётгани ҳақида хабарлар тарқалди. Режиссёр Зебо Наврўзова «Дарё» мухбирларини кенжа ўғли Муҳаммадали Наврўзов режиссёрлигида суратга олинган «Менинг тўйим» фильмининг ёпиқ премьерасига таклиф этди.
«Менинг тўйим» фильмининг ёпиқ премьерасида ўзбек шоу-бизнесининг кўплаб вакиллари, вайнерлар ва кино оламининг кўзга кўринган вакиллари иштирок этди.
Шу йилнинг ёз ойида фильм билан боғлиқ кўп пиарлар тарқалганди. Шулардан бири стилист Акобир Ашуралиев «Афандининг қизлари» жамоасидаги Нигина Жабборованинг қўлини сўрагани ҳақида эди. Аммо айнан «Модда ҳафталиги»даги қизнинг қўлини сўраш саҳнаси фильмга киритилмаган.
Фильмда бош ролларни Муҳаммадали Наврўзов ва Ситора Алимжоновалар талқин этган. Бундан ташқари, Муяссар Бердиқулова, Толиб Мўминов, Феруза Собитова, Рихситилла Абдуллаев каби Ўзбек миллий академик драма театрининг кўзга кўринган актёрлари ҳам асосий ролларни ижро этган.
Бундан ташқари, мусиқий фильмда Шоҳруххон, Асал Шодиева, Муниса Ризаева, Умидахон, Абдували Ражабов каби шоу-бизнес вакиллари ҳам суратга тушган. Актриса Асал Шодиева турмуш ўртоғи билан бирга дуэт куйлаган.
Хонанда Шоҳруххон укасини қўллаб-қувватлаш учун премьерага ташриф бюурди. Аммо тўй хизматлари кўплиги сабаб, фильм бошланмасидан аввал зални тарк этди.
Кўп режиссёрлар билан ҳамкорлик қилишни истамайдиган Асал Шодиева Муҳаммадалини қўллаб-қувватлаш учун премьерадан анча аввалроқ кинозалга ташриф буюрди. Аммо унинг фильмдаги роли у қадар катта эмас.
Режиссёр Муҳаммадали Наврўзов оилавий дўсти Умидахонга алоҳида миннатдорлик билдирди. Хонанда ўша куни премьера сабаб барча хизматларидан воз кечганини таъкидлаб ўтди.
Хонанда Рухшона ҳам томошабинлар сафидан жой олди.
— Муҳаммадали ролга таклиф қилганди-да хурсанд бўлдим. Чунки фильмда кўплаб тенгдош дўстларим, яқинларим суратга тушган. Мен ўзимни съёмка учун эмас, балки дўстларим билан тоғга дам олгани учун боргандек ҳис қилдим. Мазза қилиб ишладик. Суратга олиш вақтида жуда кўп қизиқарли воқеалар бўлди, — дейди бош рол ижрочиси Ситора Алимжонова.
Фильм ижодкорлари, суратга олиш ишлари ўн кун давомида Тошкент вилоятининг Сўқоқ қишлоғида бўлиб ўтганини маълум қилишди.
Мазкур мусиқий фильм кинотеатрларда намойиш этилмайди, уни фақат Муҳаммадали Наврўзов ғояси асосида ташкил этилган платформа орқали томоша қилиш мумкин.
Муҳаммадали Наврўзов 23 август куни нафақат фильм тақдимотини, балки таваллуд кунини ҳам нишонлади.
— Ўғлимнинг илк режиссёрлик иши. Фильм жуда қисқа вақтда суратга олинди. Мазза қилиб томоша қиладиган фильм бўлган. Аммо яратган роли ҳаётдаги феъл-атворидан мутлақо фарқ қилади. Муҳаммадали ҳаётда жиддий, битта гап кам, иккита кўплик қиладиган инсон. Фильмда эса бутунлай бошқа қиёфани гавдалантирган, — дейди режиссёр Зебо Наврўзова.
Фильм ижодкорлари уни ана шундай тарзда табриклашди.
Режиссёр ва актёр Азамат Аҳроров премьерага турмуш ўртоғи билан ташриф буюрди.
Асал Шодиева негадир фильм борасидаги таассуротлари билан ўртоқлашишни истамади.
Фильм премьерасининг яна бир эсда қоларли воқеаларидан бири анча вақтдан буён Россияда истиқомат қилаётган актриса Зарина Низомиддинованинг ташриф буюргани бўлди. У билан суратга тушиш истагини билдирган ижодкорлар сони ниҳоятда кўп эди.
— «23 ТВ» асосчиси мен десам бўлади, аммо ҳозирги кунда фақат иш юритувчи вазифасини бажаряпман. Унинг раҳбарлари бошқа инсонлар. Мен медиа соҳасидаги лойиҳаларни амалга оширяпман. Яъни қўлида кучи, истеъдоди бор ижодкорларни тўплаб турли ижодий лойиҳаларни амалга оширяпмиз. Канални ривожлантириш билан бирга ўзимизнинг ижодий лойиҳаларимизни ҳам амалга оширамиз. Келажакда телевидение очиш ниятимиз ҳам бор. «Менинг тўйим» фильми ҳам айнан мана шу лойиҳалар учун тасвирга олинди, — дейди режиссёр Муҳаммадали Наврўзов.
Изоҳ (0)