Сирдарё вилояти Ховос туманида йўлкирани бермаслик масаласидаги тортишув одам ўлими билан тугади. Бу ҳақда Зомин тумани ҳокимлиги хабар қилди.
Маълум қилинишича, фуқаро (1992 йилда Боёвут туманида туғилган) муқаддам фирибгарлик ва ўғрилик жиноятини содир этиб, бир неча бор судланган. У Гулистон шаҳри «Ниҳол» маҳалласида жойлашган автобекатда Гулистон—Дўстлик йўналиши бўйича йўловчи кутиб турган 62 ёшли ҳайдовчи билан 140 минг сўм эвазига Жиззах вилоятининг Зомин туманига элтиб қўйишини келишган.
Машина Ховос шаҳарчасига етганида, йўловчи ҳайдовчига оила аъзоларини ҳам олиш кераклигини айтган. Ҳайдовчи йўналишни ўзгартириб, дастлаб Боёвут тумани марказига, шундан сўнг Гулистон тумани «Юлдуз» маҳалласига келган.
Манзилга келгач ҳайдовчи ва йўловчи йўлкира масаласида тортишиб қолган. Гумонланувчи 62 ёшли ҳайдовчини бир марта урган. Сўнг бўйнидан арқон билан бўғиб, қасддан ўлдирган.
Жиноят иши ҳужжатларига кўра, айбланувчи пробация гуруҳида рўйхатда туриб, жазони ўташдан қасддан бўйин товлаб юрган.
Ҳолат юзасидан Жиноят кодексининг тегишли моддалари билан жиноят иши қўзғатилган. Ҳозирда Сирдарё вилояти прокуратурасининг ўта оғир жиноятларни тергов қилиш бўлими томонидан тергов ҳаракатлари олиб борилмоқда.
Изоҳ (0)