Тошкент аэропортида Буюк Британия қалбаки паспортлари бўлган 7 нафар Афғонистон фуқароси қўлга олинди. Бу ҳақда ИИВ Транспорт ва туризм объектларида хавфсизликни таъминлаш департаменти матбуот хизмати хабар берди.
Маълум қилинишича, 5 август куни Тошкент—Лондон йўналиши бўйича парвоз қилмоқчи бўлган йўловчиларни паспорт назоратидан ўтказиш чоғида улар Буюк Британия фуқаролиги паспортини кўрсатган.
Текширув давомида аниқланишича, улар Тожикистонда бўлган вақтларида Буюк Британия фуқаролиги қалбаки паспортларини ноқонуний равишда қўлга киритган ва бу паспортлар билан Ўзбекистон орқали Лондонга учмоқчи бўлган.
Қўлга олинганларга нисбатан Жиноят кодексининг 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 2 ва 3-қисмлари «б» банди, шунингдек, 223-моддаси 2-қисми «б» ва «в» бандлари (бир гуруҳ шаҳслар томонидан олдиндан тил бириктирган ҳолда Ўзбекистондан чет элга ноқонуний чиқишга уриниш) билан 25-моддаси (жиноятга тайёргарлик кўриш ва жиноят содир этишга суиқасд қилиш) билан жиноят иши қўзғатилган.
Изоҳ (0)