Ўзбекистонда жадал ўсиб бораётган йўловчилар оқими таъсирида аэропортлар автоматлаштирилмоқда. Бу ҳақда Uzbekistan Airports хабар қилди.
Қайд этилишича, аэропорт фаолиятининг асосий жараёнларини рақамлаштиришни талаб қилади. Бироқ IT инфратузилма яратмасдан туриб ихтисослаштирилган тизимларни жорий этишнинг иложи йўқ. Шу сабабли республика аэропортлари учун 500 та янги компьютер, рўйхатга олиш устунлари учун 98 та принтер, 160 та коммутатор ва кириш шлюзлари, 2170 та ИП телефонлар, тармоқ ускуналари билан жиҳозланган 4 та юқори даражадаги серверлар, лицензияланган вирусга қарши ва сервер дастурлари харид қилинган. Интернетга юқори тезликда кириш учун 16 км оптик толали симлар ўтказилган.
Бундан ташқари, йил давомида аэропортларда Enterprise тоифали корпоратив почта хизмати, ИП телефония тизими, файлларни сақлаш ва алмашиш хизмати, ускуналар мониторинги ва чоп этишни бошқариш тизими, марказлаштирилган антивирус тизими ва серверларда икки факторли авторизация тизими жорий этилган. Аэропортлар ўртасида тармоқ инфратузилмаси қурилган ва янги умумий фойдаланиш платформаси CUPПС (Common Use Passenger Processing System), аэропортда йўловчиларни рўйхатга олиш ва ҳаво кемаларини марказлаштириш бўйича янги тизимлар жорий этилган.
Инфратузилма тайёр бўлгач «Uzbekistan Airports» мутахассислари мамлакат халқаро аэропортларини янги босқичга олиб чиқиш учун муҳим IT ва дастурий таъминот тизимларини босқичма-босқич жорий этишга киришган. Айни пайтда аэропортда операцион маълумотлар базаси АОДБ (Airport Operational Database) тизими, авиакомпаниялар билан слотларни мувофиқлаштириш ва жадвални яратиш учун Slot (Slot Management System) тизими ва йўловчиларга маълумотларни визуал етказувчи ФИДС (Flight Information Display Systemс) тизими жорий этилган.
АОДБ тизими кўп сонли ташувларни, шу жумладан, трансферларни хавфсиз ва самарали бошқариш имконини беради. Ҳар куни ўнлаб аэропорт хизматлари тизимни маълумотлар билан тўлдириб, барча аэропортлар учун ягона маълумотлар базасини шакллантиради. Унда ҳар куни ҳаво кемаларининг барча учиш ва қўнишлари, рўйхатдан ўтиш ва бортга чиқиш вақти, йўловчилар ва багажлар сони, хизмат кўрсатишда қатнашган техникалар тўғрисида маълумотлар тўпланиб боради. Илгари шу каби маълумотлар қоғоз шаклида бир мунча хатоликларга йўл қўйилган. АОДБ асосида Slot ва ФИДС қуйи тизимлари ўрнатилган. Slot-координация тизими автоматик равишда парвозлар жадвалини — келиш ва жўнаш вақтларини яратади. ФИДС тизими АОДБ ва SLOT билан интеграциялашган ҳолда йўловчилар учун зарур бўлган маълумотларни аэропорт терминалларидаги таблоларда акс эттиради.
Таъкидланишича, айни пайтда ДЛП (Data Leak Prevention) ва СИЭМ (Security information and event management) хавфсизлик тизимларини, багажни юклашни бошқариш тизимини БРС (Baggage reconciliation system), РМС (Resource Management System) ресурсларни бошқариш ва тарқатиш тизими, рўйхатга олиш тизими, автотураргоҳ тизими, йўловчиларни автоматик хабардор қилувчи Voice Announcement тизими, бортга чиқиш учун электрон талонни қайта ишлаш тизими, селф-гате, дроп-офф, селф-чеcк-ин, шунингдек, меҳмонлар учун бепул Wi-Fi тизимларини аэропортда жорий этишга тайёргарлик кўрилмоқда. Ушбу тизимлар барча аэропортларда бир вақтнинг ўзида жорий этилмоқда, бу эса ишга тушуриш ва қўллаб-қувватлаш харажатларини камайтиради, эксплуатация ва хизматлар сифатини оширади.
Изоҳ (0)