Тошкент шаҳрининг Олмазор ва Янгиҳаёт туманларида ўтказилган тунги рейдлар давомида гиёҳванд модда олиб юрган шахслар ушланди. Бу ҳақда Йўл ҳаракати хавфсизлиги хизмати хабар берди.
Текширувлар давомида:
8 август куни соат 12:20 да Олмазор туманида жойлашган «Минерал сувлар» блок-постида хизмат олиб бораётган ЙПХ ходими томонидан Тошкент вилоятидан пойтахтга кириб келаётган Лабо тўхтатилиб, холис ва гувоҳлар иштирокида текширилган. Унда ҳайдовчи — 1986 йилда туғилган А.А.нинг ёнидаги сигарета қутиси ичидан целлофанга ўралган, жигарранг, ўткир ҳидли, сақичсимон модда топилган.
Мазкур ҳолат юзасидан тегишли ҳужжатлар расмийлаштирилиб, фуқаро А.А. ва топилган модда Олмазор тумани ИИО ФМБга топширилган.
Худди шу блок-постда, шунингдек, Тошкент вилоятидан пойтахтга кириб келаётган, ҳайдовчи — 1987 йилда туғилган О.А. бошқарувидаги Lacetti тўхтатилиб, холис ва гувоҳлар иштирокида текширилган. Унда автомобиль салонидан қоғозга ўралган, жигарранг, ўткир ҳидли, қуритилган ўсимлик моддаси топилган. Фуқаро О.А. ва топилган модда Олмазор тумани ИИО ФМБга топширилган.
9 август куни соат 00:10 да Янгиҳаёт туманида жойлашган «Янгиҳаёт» блок-постида хизмат олиб бораётган ЙПХ ходими томонидан Тошкент вилоятидан пойтахтга кириб келаётган, ҳайдовчи — 1994 йилда туғилган Э.А. бошқарувидаги Matiz тўхтатилиб, холис ва гувоҳлар иштирокида текширилган. Унда автомобиль салонидан целлофанга солинган, оқ рангли, ўткир ҳидли, кукунсимон модда топилган.
Мазкур ҳолат юзасидан тегишли ҳужжатлар расмийлаштирилиб, фуқаро Э.А. ва топилган модда Янгиҳаёт тумани ИИО ФМБга топширилган.
Изоҳ (0)