Самарқандда 21 миллиард сўмлик бензин ва дизель ёнилғиси талон-торож қилингани аниқланди (видео)

Самарқанд вилоятида жойлашган «Мароқанд нефть базаси» МЧЖга қарашли Булунғур филиалида нефть маҳсулотларини жуда кўп миқдорда талон-торож қилиш ҳолати аниқланган. Бу ҳақда «Ўзбекнефтгаз» АЖ матбуот хизмати «Дарё»га маълум қилди.

Хабар қилинишича, «Ўзбекнефтгаз» АЖ тизимида ўтказилаётган коррупцияга қарши курашишга қаратилган профилактик тадбирлар ўтказилмоқда.

Хусусан, «Мароқанд нефть базаси» МЧЖга қарашли Булунғур филиалида нефть маҳсулотларининг навбатдан ташқари инвентаризацияси ўтказилган.

Ўрганишлар жараёнида Булунғур филиали моддий жавобгар шахси Х.Л. жавобгарлигидаги нефть маҳсулотлари инвентаризациядан ўтказилганда, 7 та вертикал пўлат сиғимларга (РВС) қасддан техник ўзгартириш киритиш ва қўлбола усулда сиғим ичига темир қувур жойлаштирилганлиги аниқланган.

Дастлабки маълумотларга кўра, 21 миллиард 494 миллион 700 минг сўмлик нефть маҳсулотлари камомадига йўл қўйилган.

Хусусан:

- АИ-80 автобензинидан 18 миллиард 340 миллион 4 минг сўмлик 2 382,1 тонна;

- ЭКО маркали дизель ёқилғисидан 75 миллион сўмлик 4,7 тонна;

- ТДЛ-05 маркали дизель ёнилғисидан 1 миллиард 752 миллион 1 минг сўмлик 111,6 тонна;

- ТД-К5 евро маркали дизель ёқилғисидан 1 миллиард 327 миллион сўмлик 75,1 тонна.

Қўшимча қилинишича, ҳолат юзасидан тўпланган ҳужжатлар ҳуқуқни муҳофаза қилувчи органларга тақдим этилган.