Россияда ҳосилнинг қисқариши ва дон экспортининг камайиш хавфи юзага келди

Россия Қишлоқ хўжалиги вазирлиги жорий мавсумда глобал озиқ-овқат хавфсизлиги нуқтаи назаридан жиддий хавфларни кўрмоқда. Бу ҳақда вазирликнинг Telegram каналида хабар берилди.

Жорий мавсумда бир қатор сабаблар, жумладан, АҚШ ва Европадаги қурғоқчилик, Австралиядаги сув тошқини ва Ҳиндистондаги ёмон об-ҳаво туфайли буғдойнинг глобал таъминоти камаяди, — деди Қишлоқ хўжалиги вазири Дмитрий Патрушев

Бундан ташқари, буғдой сифати биринчи навбатда АҚШда иқлим аномалиялари туфайли пасайиши кутилмоқда.

Буларнинг барчаси логистика чекловлари билан биргаликда глобал озиқ-овқат таъминотига жиддий хавф туғдириши мумкин.

Россияда айни пайтда йиғиб олинган ғалла ҳажми бир йил аввалгига нисбатан сезиларли даражада кам.

Патрушевнинг сўзларига кўра, буларнинг барчаси мамлакатда прогноз қилинган жами 130 миллион тонна ғалла ҳосилига эришишда муаммоларга сабаб бўлади.

Агар режалаштирилган ҳажмларга эришилмаса, 50 миллион тонналик экспорт режаларимизни қайта кўриб чиқишга мажбур бўламиз. Бу жаҳон ғалла бозорига салбий таъсир кўрсатиши мумкин, — деди Патрушев.

Ҳосил майдонининг 27 фоизи ўриб олинди, деҳқонлар 55 миллион тоннага яқин ғалла йиғиб олди.

Умуман олганда, ҳозирги ҳосил ёмон эмас, лекин йиғиб олинган ғалла ҳажми бир йил олдингига нисбатан сезиларли даражада кам.

Аввалроқ Россия санкциялар бекор қилинса, очликка қарши кураш учун мамлакатларни дон билан таъминламоқчилиги ҳақида хабар берилганди.