Инфляция, иқлим ўзгариши ва озиқ-овқат инқирози: дунё экспертлари иқтисодиёт учун энг катта хавфлар ҳақида маълум қилди

Bloomberg иқтисодиёт учун энг катта хавф нима эканлиги ҳақида мутахассислар фикрини ўрганиб чиқди.

Франциянинг Европа ишлари бўйича давлат котиби — Лоренс Бун

Бугунги кунда дунё, хусусан Европа дуч келаётган энг катта иқтисодий хавф — бу энергетика ва озиқ-овқат инқирозидир.

Биринчидан, нархларнинг кескин кўтарилиши нафақат камбағаллар, балки ўрта синфнинг қуйи қатлами учун ҳам жиддий муаммоларни келтириб чиқармоқда.

Иккинчи оқибат эса Яқин Шарқ ва Африкада очарчилик хавфининг ошиши, чунки нафақат бу қишда, балки келгуси қишда ҳам энергия танқислиги юзага келади. Бу Европада ижтимоий нотинчлик хавфини оширади.

Атланта Федерал захира банки президенти — Рафаел Бостиc

Энг катта иқтисодий хавф — АҚШ истеъмолчилари нархларнинг кўтарилиши узоқ давом этишини тахмин қилиб, харажатларини ошира бошлаши.

Уларнинг юқори инфляцион кутилмалари ва уларга асосланиб чиқарган қарорлари инфляцияга сезиларли таъсир кўрсатади.

Берклидаги Калифорния университетининг иқтисод профессори ва ХВФнинг собиқ бош иқтисодчиси — Морис Обстфелд

Глобал ҳамжамият иқлим ўзгаришидан тортиб биологик хилма-хилликнинг йўқолиши, ўрмонларнинг кесилиши, океанлар ва ичимлик сувида микропластмассаларнинг тарқалишигача бўлган ўзаро боғлиқ хавфлардан иборат кенг миқёсли экологик таназзулга дуч келмоқда.

Патоген таҳдидларнинг кучайиши инсониятнинг сайёралар чегаралари билан тўқнашувининг бир белгисидир. Шу билан бирга, бизнинг ички сиёсий тизимларимиз ва глобал бошқарув механизмларимиз биз дуч келадиган экзистенсиал хавфларни бартараф эта олмаяпти.

HSBC Holdings бош Осиё иқтисодчиси — Фредерик Нейман

Энг катта иқтисодий хавф — бу оғир турдаги стагфляция бўлиб, бу нархлар барқарор ва тез суръатлар билан ўсиб боришига сабаб бўлмоқда.

Ушбу сценарийда марказий банклар нархлар ўсишини тўхтата олмайди ва юқори фоиз ставкалари билан молиявий стрессни кучайтиради.

Sadie Collective нотижорат ташкилотининг ҳаммуассиси — Анна Гифти Опоку-Агеман

Мен учун энг катта иқтисодий хавф-хатарлардан бири бу иқтисодий сиёсат қарорларини қабул қилишда қора ва жигарранг одамларни ҳисобга олмасликдир.

Ушбу заиф гуруҳлар яқинлашиб келаётган ва аллақачон мавжуд бўлган иқтисодий воқеликлар билан қандай курашишини тан олмаслик, охир-оқибатда ҳамма учун қимматга тушади ва мавжуд тенгсизликларни янада кучайтиради, бу эса биз эришаётган ҳар қандай тараққиётга путур этказади.

Биз буни 2009 йилда, иқтисодий тикланиш ҳаракатлари ишсизлик даражаси ошган қора танли аёлларни четлаб ўтганида кўрдик. Умид қиламанки, биз яна бир хил хатога йўл қўймаймиз.

Нобель мукофоти совриндори ва Нью-Йорк шаҳар университети магистратура марказининг иқтисод профессори — Пол Кругман

Узоқ муддатли иқлим ўзгариши, уруш ва шунга ўхшаш даҳшатли нарсалар доимо мавжуд. Аммо қисқа муддатда, менимча, энг катта хавф бу — Fed ставкани ҳаддан ташқари ошириб юборишидир.