Самарқандда ҳайдовчилардан «ўлпон» талаб қилиб келганлар 10 суткага қамалди

Самарқанд вилояти Паст Дарғом туманида ҳайдовчилардан «ўлпон» талаб қилганлар қўлга олинди.

«Қатор терак» маҳалласида яшовчи 1994 йилда туғилган Х.Ш. ва Жума шаҳри «Сазаған» маҳалласида яшовчи 1993 йилда туғилган Ж.Ш.лар спиртли ичимлик таъсирида, маст ҳолатда, жамоат жойи ҳисобланган «Жума авто бош бекати»да, ўзига олдиндан таниш бўлган «Беклар» маҳалласида яшовчи 1983 йилда туғилган Самарқанд–Жума йўналишида киракашлик қилувчи Ж.Б. билан, уларга йўналишга чиқиши учун пул тўламаганини важ қилиб, жанжал қилмоқчи бўлишган.

Туман ИИБ ходимлари томонидан олиб борилган тезкор тадбирлар натижасида, жанжални ташкил қилмоқчи бўлган шахслар шу бекатда киракашлик билан шуғулланувчи ҳайдовчилардан «ўлпон» талаб қилиш билан шуғулланишлари аниқланган.

Шундан сўнг, тадбир ташкил қилиниб, жанжал бўлиши мумкин бўлган жойга махсус гуруҳ билан чиқилиб, ҳолатга алоқадор барча шахслар қўлга олинган.

Мазкур ҳолат юзасидан юқоридаги шахсларга нисбатан 10 (ўн) суткадан маъмурий қамоқ жазоси тайинланган.

Ҳозирда автотураргоҳларни ноқонуний равишда эгаллаб олиб, ҳайдовчилардан пул талаб қилиб келаётган гуруҳларни аниқлаш бўйича тадбирлар давом эттирилмоқда.