«Рома» Белотти билан шартнома имзолаш учун Элдор Шомуродовни тезроқ сотиб юбормоқчи

Ўзбекистонлик футболчи Элдор Шомуродов «Рома»ни тарк этишга яқин.

Римликлар «Торино» собиқ ҳужумчиси Андреа Белотти билан шартнома имзолаш учун маошлар ведомостини камайтирмоқчи. Бу ҳақида журналист Николо Скира ўз Twitter саҳифасида маълум қилди.

Хабарга кўра, Шомуродов «Болонья»га ўтади. Элдорнинг кетиши йилига 3 миллион евро олишни истайдиган Белотти билан шартнома имзолаш имконини беради.

Аввалроқ Шомуродовга «Болонья», «Вулверҳэмптон», «Сассуоло», «Ал-Ҳилол» ва «Торино»дан қизиқиш борлиги хабар қилинганди.

Шомуродов 2021 йилнинг ёзги трансфер ойнасида 18 миллион евро эвазига «Женоа»дан «Рома»га ўтганди. У «бўрилар»сафида жами 40 та ўйин ўтказиб, бешта гол ва олтита голли узатма амалга оширди.