Буюк Британияда Темза дарёсининг Глостершир графлигидаги манбаи қуриб, оқим бўйича 8 км пастга тушиб қолди. Бу ҳақда The Guardian газетаси Британиянинг The Rivers Trust хайрия ташкилоти эксперти Роб Коллинзга таяниб хабар берди.
«Узоқ давом этган қурғоқчил ҳаводан кейин Темзанинг Глостерширдаги манбаи қуриб қолди ва ҳозир йўналиш бўйлаб 5 миль пастроқда кучсиз оқим билинар-билинмас бўлиб кўриняпти», — деди Коллинз ва иқлим ўзгариши туфайли қурғоқчил даврлар кўпайиб бораётгани, бу эса сув етишмовчилигига сабаб бўлиб, «йўқолиб бораётган ресурслар учун рақобат кучайиши ҳамда сув флораси ва фаунаси учун ҳалокатли оқибатларга олиб келиши» ҳақида огоҳлантирди.
Темза дарёсининг узунлиги қарийб 350 километрга тенг, у Буюк Британияда Северн дарёсидан кейинги иккинчи энг узун дарё ҳисобланади. Англия ғарбидаги Глостершир графлигидан бошланиб, саккизта графлик, шунингдек, Лондон ҳудудидан оқиб ўтади ва Шимолий денгизга бориб қуйилади.
Июль ойида Европа мамлакатларида рекорд даражадаги жазирама кучайди. Чунончи, 19 июль куни Буюк Британияда кузатувлар тарихидаги энг юқори ҳарорат қайд этилди: пойтахтдаги Хитроу аэропорти яқинидаги ҳарорат Цельсий бўйича 40,2 даражага тенг бўлди. Бундай об-ҳаво бир нечта мамлакатларда ёнғинларга ва сув ҳавзалари қуриб қолишига сабаб бўлди.
Мавзуга доир:
Изоҳ (0)