Uzbekistan Airports компанияси Ўзбекистондаги Duty Free дўконлари учун масъул бўлган Central Asia Megastar МЧЖнинг 23,3 фоиз улушини сотиб олди. Бу ҳақда «Дарё»га битим ҳужжатларидан маълум бўлди.
Сотувчи Uzbekistan Airways бўлди. Битим суммаси 400 344 000 сўмни ташкил этди.
Ўзбекистондаги Duty Free дўконларнинг асосий эгаси Premium Globe Investment МЧЖ бўлиб қолмоқда — унга компаниянинг 51 фоизи тегишли.
Бундан ташқари, Давлат активларини бошқариш агентлиги Central Asia Megastar МЧЖнинг 25,6 фоизига эгалик қилади.
Буларнинг барчаси нимани англатади?
Uzbekistan Airports аэропортларни ривожлантиришга комплекс ёндашишга ҳаракат қилмоқда.
Масалан, яқинда компания Тошкент аэропорти яқинидаги, авваллари ҳокимлик балансида бўлган ҳудудни ўз назоратига олди.
Бу автотураргоҳларни автоматлаштириш, аэровокзал олдидаги ҳудудларни қайтадан қулай лойиҳалаштириш, йўловчиларни кутиб олувчилар ва кузатувчилар учун кўпроқ қулайликлар яратиш ҳамда ўз ечимини кутаётган такси хизмати билан боғлиқ муаммоларни ҳал қилиш имконини беради.
Изоҳ (0)