Иқтисодий тадқиқотлар ва ислоҳотлар маркази томонидан жорий йилнинг 1-ярим йиллигида Ўзбекистон автомобиль бозоридаги ҳолат таҳлил қилинди. Бу ҳақда «Review.uz» хабар берди.
2022 йилнинг 1-ярмида Ўзбекистонда 712 мингта автотранспорт воситалари олди-сотдиси амалга оширилган бўлиб, бу ўтган йилнинг мос даврига нисбатан 2,1 баробар кўпдир.
Йил бошидан буён мамлакатнинг барча ҳудудларида автомобиль савдоси сезиларли даражада ошди.
Жумладан, энг юқори ўсиш суръатлари Наманганда 3 баробар (+45,4 минг), Андижонда 2,5 баробар (+32,2 минг), Бухорода 2,4 баробар (+24,7 минг), Сурхондарёда 2,4 баробар (+23,9 минг) ва Фарғонада 2,4 баробар (+45,7 минг) қайд этилди.
Ўсишнинг 17 фоизи давлатдаги ишлаб чиқариш ҳажмининг ўсиши (64,4 мингта), 1 фоизга яқини импортнинг ўсиши (2,6 мингта) ва қолган 82 фоизи иккиламчи бозор ҳажми ўсиши эвазига тўғри келади (308 мингта).
Бирламчи бозор
Умуман олганда, рўйхатга олинган автотранспорт воситалари умумий сонининг 24 фоизи янги транспорт воситаларидир.
Бирламчи бозорда харид қилинган автомобиллар сони 170 минг донани ташкил этган. Ундан маҳаллий ишлаб чиқариш – 160,3 мингта, хорижий – 9,8 мингта, 2022 йилнинг шу даврига нисбатан 1,6 баробарга (+67 минг) ўсди.
Ҳудудлар кесимида энг кўп ўсиш Тошкент шаҳрида 1,7 баробар (+18 минг), Фарғона - 1,8 баробар (+6 минг), Самарқанд 1,6 баробар (+5,6 минг), Хоразм 1,8 баробар (+5,6 минг), Андижон 1,7 баробар (+4,9 минг) ва Бухоро 1,7 баробар (+4,8 минг) вилоятларида кузатилди.
Иккиламчи бозор
2021 йилнинг биринчи ярмида иккиламчи бозорда ўртача 224 минг дона автотранспорт воситалари сотилган бўлса, жорий йил бошидан буён ушбу кўрсаткич 542 минг донани ташкил этди.
Автомобильлар савдосининг бундай кескин ўсиши 2022 йил 1 январдан бошлаб автотранспорт воситаларини рўйхатдан ўтказиш ва қайта рўйхатдан ўтказиш учун йиғимнинг, шунингдек, олди-сотди шартномасини нотариал тасдиқлаганлик учун ундириладиган давлат божи тўлиқ бекор қилиниши билан боғлиқ.
Хорижий автомобиллар савдоси
Жорий йилнинг 1-ярмида янги чет элда ишлаб чиқарилган автотранспорт воситалари олди-сотди шартномалари сони 9,8 мингтани ташкил қилган бўлиб, ушбу кўрсаткич ўтган йилга нисбатан 1,5 баробарга ошган.
Чет элда ишлаб чиқарилган янги автомобиллар савдосининг 51 фоизга яқини Тошкент шаҳри ҳиссасига тўғри келади.
Ҳудудлар кесимида бу кўрсаткич мос равишда Тошкент 9 фоиз, Қашқадарё 7 фоиз, Самарқанд 6 фоиз, Бухоро 5 фоиз, Навоий 5 фоиз, Хоразм 4 фоиз ва Андижон 3 фоиз вилоятларида қайд этилди.
Аввалроқ Ўзбекистонга энг кўп «иномарка’’лар қаердан олиб келиниши маълум бўлган эди.
Изоҳ (0)