Андижон вилояти Хўжаобод туманида экстремистик руҳдаги материалларни тарғиб қилган шахс аниқланди. Бу ҳақда вилоят Ички ишлар бошқармаси хабар қилди.
Қайд этилишича, 25 июль куни ҳуқуқни муҳофаза қилувчи орган ходимлари тадбир ўтказилган. Унда Хўжаобод туманида яшовчи, муқаддам судланиб озодликдан маҳрум қилиш тариқасидаги жазо муддатини ўтаб чиққан фуқаро Р.М. Facebook ижтимоий тармоғида профил яратиб, ушбу профили орқали экстремистик материалларни тарқатиб келгани аниқланган. У Ўзбекистонда фаолияти тақиқланган «Ҳизб ут-таҳрир» ташкилотининг ғояларини илгари сурувчи видео материалларни профилига жойлаштириш орқали ўзининг дўстлар саҳифасидаги 187 нафар сайт фойдаланувчилари билан улашган.
Ушбу шахс муқаддам диний-экстремистик ташкилотдаги фаолияти учун судланиб озодликдан маҳрум қилиш жазосини ўтаб чиққан эди.
Ҳолат юзасидан Жиноят кодексининг 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми «г» банди билан жиноят иши қўзғатилиб, «қамоқ» эҳтиёт чораси қўлланилган.
Изоҳ (0)