Осиё тараққиёт банки (ОТБ) ривожланаётган Осиё-Тинч океани минтақаси мамлакатлари учун жорий йилда иқтисодий ўсиш прогнозини 4,6 фоизгача пасайтирди. Бу ҳақда «Дарё»га банк ҳисоботидан маълум бўлди.
Мазкур прогноз ОТБ томонидан апрель ойида эълон қилинган 5,2 фоиз прогнози билан таққосланади. Банк озиқ-овқат ва ёқилғи нархларининг ошиши туфайли минтақа учун инфляция прогнозини ҳам оширди.
ОТБнинг «Осиё ривожланиши истиқболлари»нинг (Asian Development Outlook) 2022 йилги нашрига қўшимчасида айтилишича, Осиё ва Тинч океани минтақасидаги ривожланаётган мамлакатлар COVID-19 пандемиясидан сўнг тикланишда давом этмоқда.
Бундан ташқари, ривожланаётган Осиёда COVID-19 га қарши эмлаш даражаси сезиларли даражада ошди.
Ҳисоботда келтирилишича, Ўзбекистонда 60 фоизга яқин аҳоли ковидга қарши эмланган ва тахминан 46-48 фоиз аҳоли тўлиқ вакцина қабул қилган.
Тожикистонда эмланиш даражаси 65 фоизга яқин бўлса, Қозоғистонда — 61 фоиз. Қирғизистонда бу кўрсаткич жуда паст сақланиб қолмоқда — 25 фоиз.
Кўпгина давлатлар томонидан чекловларнинг юмшатилиши иқтисодий фаолликнинг ошишига олиб келмоқда.
Бироқ, COVID-19 билан боғлиқ янги чекловларнинг ўрнатилиши ва заиф глобал талаб туфайли минтақанинг энг йирик иқтисодиёти бўлган Хитойда ўсиш секинлашди.
Украинадаги уруш оқибатлари инфляция босимини кучайтирди ва бу ўз навбатида бутун дунё бўйлаб марказий банкларни фоиз ставкаларини оширишга мажбур қилаётганлиги сабабли ўсишни тўхтатиб қўйди, — деди банк бош иқтисодчиси Алберт Парк.
Ривожланаётган Осиё ва Тинч океани минтақаси мамлакатларидаги инфляция бу йил олдинги 3,7 фоиз прогнозга нисбатан 4,2 фоизга тезлашиши кутилмоқда.
Бироқ, умуман олганда, минтақада инфляция босими ҳали ҳам дунёнинг бошқа жойларига қараганда паст.
ОТБ минтақа учун 2023 йил иқтисодий ўсиш прогнозини 5,3 фоиздан 5,2 фоизга туширди ва инфляция прогнозини ўз навбатида 3,1 фоиздан 3,5 фоизга оширди.
Баъзи ҳудудлар учун ўсиш прогнозлари оширилди. Жануби-Шарқий Осиё учун прогноз COVID-19 чекловларининг енгиллаштирилиши натижасида ички талабнинг ошиши сабабли бу йил 4,9 фоиздан 5 фоизга оширилди.
Кавказ ва Марказий Осиё бўйича прогноз 3,6 фоиздан 3,8 фоизга оширилди, чунки ушбу ҳудуддаги баъзи давлатлар Россиянинг Украинага бостириб киришининг иқтисодий оқибатларини кутилганидан кўра яхшироқ енгиб ўтди.
2021 йилдан 2022 йилнинг 14 июлигача бўлган давр учун Ўзбекистонда асосий ставка 2 фоизга кўтарилган. 21 июль куни эса Марказий банк асосий ставкани 1 фоизга пасайтириб, 15 фоиз этиб белгилади.
ОТБ ҳисоботида келтирилишича, Қозоғистонда асосий ставка 2021 йилда ҳам оширилган. Жорий йилда эса бу кўрсаткич яна ҳам тезлашди. Йил бошидан бери асосий ставка Қозоғистонда 4,25 фоизга кўтарилган.
2022 йилда аксарият валюталар АҚШ долларига нисбатан қадрсизланди. Ўзбекистонда сўмнинг долларга нисбатан йил бошидан бери қадрсизланиши 1,2 фоизга тенг бўлди.
Тинч океанида Фижига туризмнинг тикланиши сабабли субрегионнинг ўсиш прогнози 3,9 фоиздан 4,7 фоизга яхшилади.
ОТБ ўта қашшоқликка барҳам бериш бўйича саъй-ҳаракатларини давом эттириб, ривожланган, кенг қамровли ва барқарор Осиё ва Тинч океани минтақасига эришишга интилади.
Банк 1966 йилда ташкил этилган бўлиб, унга 68 мамлакат аъзо бўлган. Уларнинг 49 таси минтақада жойлашган.
Изоҳ (0)