Соғлиқни сақлаш вазирлиги матбуот хизмати организмда йўқотилган кальций ўрнини қандай тўлдириш мумкинлиги борасида тиббиёт фанлари доктори Умида Рустамова берган маълумотларни тақдим этди.
Мутахассиснинг айтишича, организмнинг тўлақонли ривожланишида кальций моддаси алоҳида ўринга эга. Унинг кунлик миқдори эса ҳар бир ёш тоифаси учун турлича.
Тавсия этилган кунлик кальций миқдори:
- 0—3 ойлик чақалоқлар учун 400 миллиграмм;
- 4—6 ойлик гўдаклар учун 500 миллиграмм;
- 7—12 ойлик ўғил-қизлар учун 600 миллиграмм;
- 1—3 ёшлилар учун 800 миллиграмм;
- 7—11 ёшдаги болалар учун 1100 миллиграмм;
- 11—18 ёшдаги ўсмирлар учун 1200 миллиграмм;
- 18—59 ёшдаги катталар учун 1000 миллиграмм;
- 60 ёшдан юқори кишилар учун 1200 миллиграмм;
- ҳомиладор аёллар учун 1300 миллиграмм ва эмизикли оналар учун 1400 миллиграмм.
Қолаверса, ҳеч бир дори воситаси сифатли, тўйимли ҳамда соғлом овқатланишнинг ўрнини боса олмайди. Шу боис мазкур муаммони бартараф этишда тўғри таомланишга алоҳида эътибор қаратиш лозим.
Жумладан, кунлик таомномада сут маҳсулотлари (творог, йогурт, кефир, пишлоқ, қатиқ, сузма) бўлиши мақсадга мувофиқ. Шунингдек, денгиз маҳсулотларида ҳам кўп миқдорда кальций мавжуд. Бундан ташқари, улар таркибида D витамини ва фосфор мўл. Бу дармондорилар эса суякларни мустаҳкамлашга катта ёрдам беради.
Турли мева-сабзавот ва кўкатлар — карам, салат барги, селдерей, петрушка, кунжут уруғи, ёнғоқлар таркибида ҳам кальций моддаси кўп учрайди. Энг муҳими, табиий маҳсулотлардаги ушбу модданинг ортиқча миқдори кальций препарати каби организм учун зарарли эмас. Сабаби мазкур фойдали макроэлемент сунъийси каби организмда йиғилиб қолмайди.
Бироқ айрим ширин газли ичимликлар ва шўр озиқ-овқат маҳсулотлари таркибидаги натрий хлорид кальций моддасининг пешоб билан организмдан чиқиб кетишига сабаб бўлади. Шунингдек, организм кальций моддасини ўзлаштиришида D витаминининг аҳамияти беқиёс. Хусусан, ушбу дармондори танада 30—40 фоиз мазкур элементнинг сўрилишига ижобий таъсир этади. Бу витаминнинг энг кўп манбаи эса қуёш нурларида мавжуд.
Айни сабабдан қуёш чиққандан бошлаб соат 11:00 гача ва кечки 17:00 дан кейин очиқ ҳавода сайр этиш тавсия этилади. Чунки бу пайтда унинг ультрабинафша нурлари таъсири остида организмда D витамини ҳосил бўлади. Бироқ қолган вақтларда иссиқ ҳавода сайр қилиш соғлиқ учун зарарли.
Изоҳ (0)