Наманганда адлия идоралари томонидан жорий йилнинг 7 ойи мобайнида 6,5 мингдан ортиқ қонунбузилиш ҳолати аниқланди. Бу ҳақда вилоят адлия бошқармаси бошлиғининг ўринбосари Давронбек Равшанбеков маълум қилди, дея хабар беради «Дарё» мухбири Азизбек Абдувалиев.

Аниқланган қонунбузилиш ҳолатларининг 5497 таси муддат бузилиши, 342 таси бевосита давлат идораларида хизматлар кўрсатилиши, 526 таси ортиқча ҳужжатлар талаб қилиниши, 111 таси мурожаатларнинг асоссиз рад этилишига тўғри келади.

«Қонунбузилиш ҳолатлари корхона ва ташкилотлар кесимида таҳлил қилинганида уларнинг аксарияти газ, сув ва электр корхоналари, кадастр, ҳокимлик, солиқ ва ижтимоий таъминот идораларига тўғри келиши маълум бўлди», — дейди Давронбек Равшанбеков.

Қайд этилишича, аниқланган қонунбузилиш ҳолатлари юзасидан ваколатли органларга 33 та тақдимнома, 171 та огоҳнома киритилган. Уларга асосан 31 нафар мансабдор шахсга нисбатан интизомий жавобгарлик чоралари қўлланган, икки нафар масъул ходим билан тузилган меҳнат шартномаси бекор қилинган.

Мавзуга доир:

• Тошкент шаҳар адлия бошқармаси томонидан 83 та ходимга 656 млн сўм ҳомиладорлик ва туғиш нафақалари ундириб берилди
• Бухоро ҳокими ер билан боғлиқ қонунбузилишлар ҳақида хабар берган шахсларни рағбатлантиришини билдирди