Самарқанд вилояти Паст Дарғом туманида бир гуруҳ шахслар содир этиши мумкин бўлган катта жанжалнинг олди олинди. Бу ҳақда вилоят ичи ишлар бошқармаси ахборот хизмати маълум қилди.
Хабар қилинишича, «Зангибойи» маҳалласи ҳудудидаги ошхоналарнинг бирида икки киши овқатланиб ўтирган. Паст Дарғом тумани «Бахшибойи» маҳалласида яшовчи, уларга олдиндан таниш бўлган Синдор, Асад, Рамзиддин, Камрон, Маъруф ҳамда Али исмли шахслар маст ҳолатда ҳеч бир сабабсиз бақир-чақир қилиб, уларни ёнига чақирган ва саломлашмаганини важ қилиб, жанжал кўтарган.
Вилоят ИИБ ЖҚБ Уюшган жиноятчиликка қарши кураш бўлими ходимлари томонидан олинган тезкор маълумотларга асосан, ҳодиса жойига ИИБнинг тезкор ходимлари ҳамда Тезкор вазифаларни бажарувчи сафарбар отряди ходимлари етиб бориб, барча шахслар ушланиб, жанжалнинг олди олинган.
Аниқланишича, тумандаги «Зангибойи» ва «Бахшибойи» маҳаллаларида яшовчи ушбу шахслар ўртасида олдиндан келишмовчилик бўлган. Ҳолат юзасидан ушбу жанжалга етакчилик қилган 6 нафар шахсга нисбатан Самарқанд вилояти ИИБ ҳузуридаги тергов бошқармаси томонидан Жиноят кодексининг 277-моддаси 2-қисми «б» банди билан жиноят иши қўзғатилиб, 2 киши қамоққа олинган.
Изоҳ (0)