Самарқанд вилояти Ургут туманидаги тўйхонада оммавий заҳарланиш ва юқори ҳарорат ташхиси билан одамлар шифокорга мурожаат қилгани тўғрисида хабарлар тарқалди. Туман ҳокимлиги ҳолатни ўрганиб, бу бўйича маълумот берди.
Аниқланишича, 19 июль куни соат 22:00 атрофида Ургут тумани тиббиёт бирлашмасига қарашли юқумли касалликлар шифохонасига икки бемор озиқ-овқатдан ўткир заҳарланишга гумон ташхиси билан бўлимга олиб келинган.
Беморлар билан суҳбатда улар тўйда турли салатлар еганини маълум қилган. Шифокорлар томонидан келган беморларда керакли муолажалар ўтказилган. Туман санитария ва осойишталик маркази ходимлари ҳамда участка тиббиёт ходимлари беморларнинг яшаш ҳудудидаги касалликка гумонланганларни туман тиббиёт бирлашмаси юқумли касалликлар шифохонасига кузатув учун олиб келган.
Гумондорлар текширувдан ўтказилиб, қониқарли аҳволдалиги сабабли уйига жавоб берилган. Ҳозирги вақтда шифохонада икки нафар бемор кузатувда бўлиб турибди. Уларнинг аҳволи ўртача оғирликда.
Қайд этилишича, ҳолат «Жозмон» маҳалласида дея нотўғри маълумот берилган, воқеа Ургут туманининг «Ғиштмачит» маҳалласида содир бўлган.
«Туман тиббиёт бирлашмаси юқумли касалликлар бўлими 80 ўринга мўлжалланган бўлиб, COVID-19 билан касалланган беморлар учун қўшимча 10 та ўрин ташкил этилган. Айни пайтда юқумли касалликлар бўлимида 85 нафар бемор даволанмоқда. Ижтимоий тармоқларда тарқалган 200 нафарга яқин одам Ургут туман юқумли касалликлар шифохонасида ётибди, деб тарқалган хабар ҳеч қандай асосга эга эмаслигини маълум қиламиз», — дейилади хабарда.
Изоҳ (0)