Бош прокуратура Самарқанддаги оммавий заҳарланиш бўйича маълумот берди

Самарқанд вилояти Ургут туманидаги тўйхонада оммавий заҳарланиш қайд этилгани ҳақида хабар берилган эди. Бош прокуратура матбуот котиби ҳолат бўйича қўшимча маълумот берди.

Қайд этилишича, Ургут туманидаги тўйхоналарнинг бирида 18 июль куни бўлиб ўтган маросимда меҳмон сифатида қатнашган 56 ёшли аёл 19 июль куни ўткир овқат токсикоинфекцияси ташхиси билан шифохонага мурожаат қилган.

Бемор аёлга тез тиббий ёрдам кўрсатиш билан бир вақтда юқумли касалликлар бўлими патронаж хизмати томонидан ушбу аёл билан тўй маросимида иштирок этган бир нечта фуқаронинг хонадонига борилган ва улар юқумли касалликлар бўлимига таклиф қилиниб, текширишдан ўтказилган.

Текшириш вақтида улар ичидаги яна 10 нафар (9 нафари аёл, 1 нафари эркак) фуқарода енгил овқат токсикоинфекцияси ташхиси борлиги аниқланган. Кўрсатилган тез тиббий ёрдам натижасида уларнинг соғлиғи тўлиқ яхшиланган ва 20 июль куни уйга жавоб берилган.

Ҳозирда шифохонада фақатгина дастлаб мурожаат қилган бемор аёлга тиббий ёрдам кўрсатиб келинмоқда ва унинг ҳам соғлиғи яхшиланиб келаётгани аниқланди. Мазкур ҳолат юзасидан туман прокуратураси томонидан терговга қадар текшириш ҳаракатлари олиб борилмоқда.

Ижтимоий тармоқларда ушбу ҳолатда 200 га яқин одам заҳарлангани ҳақидаги хабар ҳақиқатга тўғри келмаслиги ҳам айтиб ўтилган.