Украина Марказий банки уруш давридаги олтин захираларининг 12 миллиард доллардан ортиқ қисмини сотди. Бу ҳақда губернатор ўринбосарига таяниб, Reuters хабар бермоқда.
Биз олтинни импортчиларимиз мамлакат учун зарур бўлган товарларни сотиб олиши учун сотмоқдамиз, — деди губернатор ўринбосари Катерина Рожкова.
Унинг айтишича, олтин Украина валютаси — гривнани мустаҳкамлаш учун сотилмайди.
Таъкидланишича, Украинага ойига 9 миллиард доллар чет эл ёрдами керак.
Даъво қилинган миқдор Украинанинг урушгача бўлган олтин захираларидан анча юқори.
Бутунжаҳон олтин кенгаши маълумотларига кўра, 2022 йилнинг биринчи чорагида Украинанинг олтин захиралари 27,06 тоннани ташкил этган. Бу эса 1,69 миллиард долларга тенг.
Уруш бошланганидан бери мамлакат сотган 12,4 миллиард долларлик олтин захираси 491 тоннага тенг ёки биринчи чоракдаги олтин захирасидан 18 баравар кўп.
Украина олтин захираларининг энг сўнгги ҳисоб-китобларига кўра, май ойида мамлакат умумий олтин захиралари 1,6 миллиард долларни ташкил қилган.
2012 йил сентябрь ойида мамлакатда энг кўп олтин захираси 1,9 миллиард доллар бўлган.
Изоҳ (0)