«Ўзбекнефтгаз» АЖ бошқаруви раиси Меҳриддин Абдуллаевнинг топшириғи билан газни қайта ишлаш заводларида табиий газдан суюлтирилган газ ишлаб чиқаришни оширишга қаратилган бир қатор чора-тадбирлар ва лойиҳалар амалга оширилмоқда.
Жумладан, Шўртан нефть ва газ қазиб чиқариш бошқармаси ва Муборак газни қайта ишлаш заводидаги табиий газ таркибидан пропан-бутан аралашмасини ажратиб олиш қурилмаларини модернизация қилиш, инвестиция лойиҳаларини амалга ошириш ҳисобидан жорий йилда 662,2 минг тонна суюлтирилган газ ишлаб чиқариш режалаштирилган. Бу ўз навбатида 2021 йилга нисбатан 17 минг тонна ортиқ ишлаб чиқаришни ёки 102,6 фоизни ташкил этади.
Бугунги кунда йиллик суюлтирилган газ ишлаб чиқариш режасини бажариш ҳамда 2022—2023 йиллар куз—қиш мавсумида республика аҳолиси ва ижтимоий соҳа объектларига суюлтирилган газни узлуксиз доимий етказиб бериш ва ишлаб чиқариш ҳажмларини ошириш бўйича «Ўзбекнефтгаз» АЖ ва бошқармалар мутахассисларидан иборат ишчи гуруҳлар тузилган бўлиб, ишлаб чиқариш кўрсаткичларини ошириш ва барқарорлигини таъминлаш бўйича ишлар тизимли ташкил этилмоқда.
Хусусан, бугунги кунда Газли нефть ва газ қазиб чиқариш бошқармасида суюлтирилган газ ишлаб чиқариш ҳажмларини ошириш бўйича тегишли мутахассислар томонидан ишлар олиб борилди. Кун исиши қурилмаларнинг технологик жараёнларига салбий таъсирини кўрсатиб, ишлаб чиқариш ҳажмларининг камайишига олиб келди, қўшимча иссиқлик алмаштириш ускуналари ва ҳаво билан совутиш ускуналарида янги технологик жараёнлар, яъни совутиш тизимини монтаж қилиб, ишга тушириш ҳамда мутахассислар томонидан технологик жараёнларга ўзгартиришлар киритиш натижасида кунлик 50 тонна суюлтирилган газ ишлаб чиқаришни оширишга эришилди.
Шўртан нефть ва газ қазиб чиқариш бошқармасида ҳам суюлтирилган газ ишлаб чиқаришни ошириш мақсадида бир қатор чора-тадбирлар белгилаб олинган бўлиб, бугунги кунда ишлар жадаллик билан олиб борилмоқда.
Ёз мавсумида кун исиши ўз навбатида технологик жараёнларга ҳамда қурилмаларнинг барқарор ишлашига ҳам салбий таъсирини кўрсатмоқда. Ишлаб чиқариш барқарорлигини таъминлаш мақсадида, 1-навбат қурилмаси кириш қисмидаги ҳаво билан совутиш ускунаси атрофига қўшимча совутиш ускунаси монтаж қилинмоқда.
Газдан пропан-бутан аралашмаси ажратиб олиш қурилмалари ишлаб чиқариш фойдали иш коэффициентини ошириш мақсадида, 8, 9-сонли газ ҳайдаш агрегатларида помпажга қарши ҳимоя клапанлари Чирчиқ шаҳридаги Dresser-Rand ташкилотида таъмирланиб, қувватларини тиклаш ишлари олиб борилмоқда. Ушбу ишларни амалга ошириш натижасида, Шўртан нефть ва газ бошқармасидаги газдан пропан-бутан аралашмасини ажратиб олиш қурилмаларида кунлик суюлтирилган газ ишлаб чиқариш ҳажмларини 30 тоннага ошириш имкони яратилади.
Куз—қиш мавсумида қурилмалар барқарорлигини таъминлаш мақсадида, Муборак газни қайта ишлаш заводида кеча-ю кундуз ишлар ташкил этилиб, қурилмаларни таъмирлаш ишлари қисқа муддатда амалга оширилди. «Ўзбекнефтгаз» АЖ бошқарув раиси Мехриддин Абдуллаев топшириғи билан қурилмаларни таъмирлаш учун кеча-ю кундуз ишлар ташкил этиш ҳисобидан, таъмир вақтида қисқариши мумкин бўлган миқдорларнинг олдини олишга эришилди. Шунингдек, қурилмаларни барқарор ишлаш эвазига июнь ойи ўртача ишлаб чиқаришга нисбатан кунлик 35 тонна миқдорлар оширишга эришилди.
2022 йилнинг январь—июнь ойларида «Ўзбекнефтгаз» АЖ тасарруфидаги нефть ва газ қазиб чиқариш бошқарма, заводларида суюлтирилган газ ишлаб чиқариш режа кўрсаткичи 319,5 минг тонна белгиланган бўлиб, амалда 340,7 минг тонна ишлаб чиқарилди ва режа бажарилиши 106,6 фоизни (ўтган йилнинг мос даврига нисбатан ўсиш суръати 109,8 фоиз) ташкил этди.
Шуни алоҳида таъкидлаш жоизки, бутун республика бўйлаб ишлаб чиқарилган суюлтирилган газ «Ўзбекнефтгаз» АЖнинг бошқарма ва заводларида амалга оширилади. Хорижий ва қўшма корхоналарга ҳам «Ўзбекнефтгаз» АЖ томонидан суюлтирилган газ ишлаб чиқариш бўйича хизмат кўрсатиш эвазига амалга оширилади.Статистик маълумотларга назар соладиган бўлсак, республика бўйича хорижий корхоналар билан бирга январь—июнь ойларида 408,5 минг тонна режа белгиланган бўлса, амалда 427,8 минг тонна ишлаб чиқаришга эришилган, режа 104,7 фоизга бажарилган.
Республикадаги хорижий компаниялар томонидан ишлаб чиқариш ҳажмларини ошириш мақсадида, «Ўзбекнефтгаз» АЖ томонидан доимий ҳамкорликда амалий ёрдам бериб келинмоқда.
Ишлаб чиқарилган суюлтирилган газни реализация қилиш январь—июнь ойларида республика истеъмолчиларига 378,6 минг тонна етказиб бериш режалаштирилган бўлиб, амалда 399,5 минг тонна етказиб берилган. Режа бажарилиши 105,5 фоизни ташкил этган.
Шу билан бирга, биринчи навбатда аҳолининг маиший эҳтиёжи ва ижтимоий соҳа объектлари учун «Ҳудудгазтаъминот» АЖнинг ҳудудий газ таъминоти филиалларига суюлтирилган газ келишилган жадваллар асосида етказиб берилиши таъминланмоқда. Ҳисобот даврида 297,2 минг тонна етказиб бериш режалаштирилган бўлиб, амалда 297,3 минг тонна режага нисбатан 100 фоиз (ўсиш суръати 106,3 фоиз) етказиб берилди.
2019—2022 йилларда аҳолининг маиший эҳтиёжи ва ижтимоий соҳа объектлари учун «Ҳудудгазтаъминот» АЖнинг ҳудудий газ таъминоти филиалларига ҳар йилига қўшимча етказиб бериш ҳажмлари оширилиб борилмоқда. Таҳлил натижаларига кўра, 2019 йилнинг 1-ярим йиллигида 224,2 минг тонна етказиб берилган бўлса, ўртача кунлик 1,2 минг тоннани ташкил этган. 2022 йилнинг 1-ярим йиллигида эса 297,3 минг тонна етказиб берилган, бу ўз навбатида бир кунда ўртача 1,6 минг тоннани ташкил этган.
«Ўзбекнефтгаз» АЖнинг бошқарма ва заводлари томонидан суюлтирилган газни сифатли ва жаҳон стандартларига мос кўрсаткичларда етказиб бериш, ишлаб чиқариш қувватларини янада ошириш ва республиканинг барча турдаги истеъмолчиларига белгиланган миқдорларда узлуксиз етказиб бериш бўйича тизимли ишлар давом эттирилмоқда.
«Ўзбекнефтгаз» АЖ матбуот хизмати
Изоҳ (0)