Ўзбекистонга 2022 йил январь—июнь ойларида хориждан 5,66 млрд доллар пул жўнатилган, деб хабар берди Марказий банк.
Бу 2021 йилнинг мос даврига нисбатан 70 фоизга (3,32 млрд доллар) кўпроқдир.
Январь—май ойларидаги маълумотлар билан солиштирилганда, июнда Ўзбекистонга 1,34 млрд доллар пул ўтказмаси келиб тушган.
Бу охирги йилларнинг бир ойлик пул ўтказмалари бўйича рекорд ҳисобланади. Май ойида 1,6 млрд долларлик пул ўтказилган эди.
Ўзбекистондаги пул ўтказмаларига нималар таъсир кўрсатади?
Пул ўтказмаларининг аҳамияти жуда катта — улар маҳаллий аҳолини таъминлайди ва мамлакат иқтисодиётини қўллаб-қувватлайди.
Пул ўтказмалари ҳаттоки хорижда ишлайдиган ҳеч кими йўқларга ҳам ўз таъсирини кўрсатади.
- Биринчидан, пул ўтказмалари ташқи савдодаги салбий салдони қисман қоплайди – Ўзбекистон деярли доимо сотишдан кўра кўпроқ харид қилади. 2021 йилда аҳолининг иккиламчи даромадлари 21 фоизгача ўсиб, 6,3 млрд долларни ташкил қилди. Бу эса четдан кириб келаётган ўтказмалар сабаб кузатилган натижадир.
- Иккинчидан, ўтказмалар сўм курсини қўллаб-қувватлайди. Улар туфайли июнь ойида сўм бор-йўғи 0,2 фоизга қадрсизланган – бу сўнгги йиллар ичидаги энг яхши кўрсаткич. Ўзбекистонга амалга ошириладиган пул маблағлари қанчалик кўп бўлса, бозордаги чет эл валютаси таклифи ҳам шунчалик юқори бўлади. Ўтган йилда мазкур таклиф 1,6 мартага ўсган эди.
Шундай қилиб, мигрантларнинг пул ўтказмалари аҳолининг тўловларни амалга ошириш имкониятини, товар ва хизматларга бўлган талабни, иқтисодий ўсишни бевосита таъминлайди.
Изоҳ (0)