Ўзбекистонда Россия компаниялари сони кескин кўпайди

2022 йилнинг январь июнь ойларида Ўзбекистонда Россия капитали иштирокида 399 та корхона ташкил этилди. Бу Давлат статистика қўмитаси маълумотида қайд этилган.

Таққослаш учун, 2021 йилнинг 12 ойида 356 та, 2020 йилда эса 265 та шундай корхона очилган эди.

Россия катта фарқ билан биринчи ўринда — иккинчи ўринда турган Туркия иштирокида икки баравар кам янги компания ташкил этилди – 183 та.

Россия иштирокидаги янги компаниялар сони февралдан кейин ошди (январда 23 та, февралда 28 та, мартда 56 та, апрелда 103 та, майда 92 та, июнда 89 та компания ташкил этилди).

Бу Украинада уруш бошлангандан кейин кўплаб россиялик тадбиркорлар Россияни тарк этиш, ўз бизнесларини бошқа давлатларга кўчиришга қарор қилганликлари билан изоҳланади.

Туркиялик, хитойлик ва бошқа тадбиркорлар томонидан Ўзбекистонда компаниялар очиш суръати ўзгармаган.

Аввалроқ Россиялик IT-мутахассислар Ўзбекистонга интилгани ҳақида хабар берилган эди.