Жорий йил 4 июлда Ўзбекистон товар-хом ашё биржасининг биржа савдолари орқали илк бор GTL дизель ёқилғиси сотилди, деб хабар бермоқда «ЎзRTХБ» ахборот хизмати.
Биржа савдоларида мазкур синтетик суюқ ёқилғининг сотувчиси сифатида Uzbekistan GTL заводи иштирок этди.
Сотувчи корхона томонидан очиқ биржа савдоларига 660 тонна GTL дизель ёқилғиси қўйилди ва ҳаммаси сотилди.
Ўтказилган биржа савдо натижаларига кўра синтетик дизель ёқилғисининг ўртача нархи маҳсулотнинг бир тоннаси учун 15,3 млн сўмни ташкил қилди.
Биржада GTL дизель бўйича шаклланган котировка унинг бошланғич нархига (15 млн сўм) нисбатан 1,8 фоизга ўсди.
GTL дизели юқори техник кўрсаткичларга эга ва таркибида олтингугурт миқдори деярли нолга тенг бўлган, атмосферага жуда кам миқдорда ифлослантирувчи моддаларни чиқарувчи маҳсулотдир.
GTL дизелини дизель двигателларида соф ҳолда ёки уни аралаштириш учун хом ашё сифатида қўллаш мумкин.
Аввалроқ Ўзбекистон нефть-кимё саноати тарихида синтетик нефтнинг биринчи партияси ишлаб чиқарилгани ҳақида хабар берилганди.
Изоҳ (0)