Бухоро аэропортида 27 минг доллар пулни ноқонуний равишда хорижга олиб чиқиб кетаётганлар ушланди. Бу ҳақда «Дарё»га вилоят Божхона бошқармаси ахборот хизмати раҳбари Жавоҳир Исмоилов хабар берди.
Таъкидланишича, Бухоро аэропорти чегара божхона пости ходимлари қонунда белгиланган тартибда хорижга жўнаб кетаётган йўловчиларни назоратдан ўтказган. Бухоролик Т.Қ., С.Ф. ва С.А. исмли фуқароларнинг яшил йўлакдаги хатти-ҳаракатлари божхоначилар эътиборини тортгач, ушбу шахслар алоҳида тартибда божхона назоратидан ўтказилган.
Натижада ушбу фуқаролар эгнидаги костюм-шимларнинг ички чўнтакларидан йўловчи божхона декларациясида кўрсатилмаган ва божхоначиларнинг оғзаки сўровида маълум қилинмаган 9 минг доллардан жами 27 минг доллар нақд хорижий валюта топилган. Улар ушбу пулларни Ўзбекистондан ноқонуний равишда олиб чиқиб кетиш режасини тузган бўлган.
«Ўзбекистондан хорижга чиқиб кетаётган уч фуқаронинг режаси амалга ошмай қолди. Улар ноқонуний хатти-ҳаракатлари учун қонун олдида жавоб берадиган бўлишди», — деди Жавоҳир Исмоилов.
Изоҳ (0)