Андижон вилоятининг Марҳамат туманида ҳоким ёрдамчиси 16 апрель куни ўз жонига қасд қилгани ҳақида хабар берилган эди. Вилоят прокуратураси ҳолат юзасидан қўшимча маълумот берди.
Унда баён қилинишича, марҳумнинг отаси М.М. ўғлининг ўлими юзасидан туман ҳокимлиги томонидан эълон қилинган ахборотнинг ёлғонлиги хусусидаги мурожаати ижтимоий тармоқларда тарқалган.
Туман ҳокимлиги ахборотида 2022 йил 11 январдан бошлаб «Полвонтош» маҳалласида ҳоким ёрдамчиси лавозимида фаолият юритиб келган М.Ф. аввал дадаси оғир хасталикка чалингани, сўнгра онаси оғир хасталик билан касалланиб, вафот этгандан сўнг ишга совуққонлик билан қарагани айтилган.
Таъкидланишича, оиласида юзага келган келишмовчиликлар сабабли спиртли ичимликларга ружу қўйган. 2022 йил март ойи давомида бир неча бор огоҳлантирилишига қарамасдан, ичкилик ичишни давом эттирган. 2022 йил 1 апрель куни ўз ихтиёри билан ишдан бўшаш тўғрисида ариза берган. Яшаш уйида ўзини осиб, жонига қасд қилиши лавозимидан бўшаганидан сўнг содир бўлган.
Андижон вилояти прокуратураси хабарида айтилишича, ҳолат юзасидан Марҳамат туман прокуратураси томонидан терговга қадар текширув ҳаракатлари ўтказилиб, унинг баданида бўйнидаги осилишдан қолган странгуляцион эгат кўринишидаги излардан ташқари бирор-бир тан жароҳатлари аниқланмаган.
Ўтказилган текширув натижасида собиқ ҳоким ёрдамчисининг ўз жонига қасд қилгани ҳолатида ўзга шахсларнинг жиноят аломатлари аниқланмаганлиги сабабли туман прокуратураси томонидан жиноят иши қўзғатишни рад қилиш ҳақида қарор қабул қилинган.
Изоҳ (0)