«Рома» «ПСЖ» президентининг босими туфайли Гампер Кубогида иштирок этишдан бош тортган

«Рома» «Барселона»га қарши бўлиб ўтиши керак бўлган Гампер Кубоги учрашувини «ПСЖ» президенти босими туфайли рад этгани айтилмоқда.

Аввалроқ Рим жамоаси «Барселона»га қарши ўйинда иштирок этмаслигини эълон қилганди. Каталонияликлар эса бу учун компенсация талаб қилганди. «Рома»нинг баёнотига кўра, мавсумолди тақвим ўзгаргани учун ушбу учрашув бекор қилинган.

Corriere dello Sport нашрининг хабарига кўра, Рим клуби «ПСЖ» президенти ва Европа клублар ассоциацияси (ECА) раҳбари Носир ал-Ҳелайфининг босими остида шу қарорга келган.

Ал-Ҳелайфи ва «Рома» хўжайини Ден Фридкин ўртасидаги муносабатлар яхши. Америкалик тадбиркор ECА директорлар кенгаши ва ижроия қўмитаси аъзоси ҳисобланади. Фридкинни Гампер Кубогидан воз кечишга ассоциация раҳбари кўндирган.

Қатарлик президент «Рома»нинг «Барселона»га қарши ўйинда иштирок этишига қарши чиққан. Чунки «кўк-анорранглилар» Европа Суперлигаси асосчиларидан бири ва ҳамон турнирни қайта жонлаштиришга умид қилмоқда. УЕФА ва ECА Суперлигага қарши чиқаётган ташкилотлар ҳисобланади.