Ташқи ишлар вазири вазифасини бажарувчи Владимир Норов 27 июнь куни Испания Қироллигининг Ўзбекистондаги фавқулодда ва мухтор элчиси (қароргоҳи Москва шаҳрида) этиб тайинланган Маркос Гомес Мартинесни қабул қилди. Бу ҳақда ТИВ ахборот хизмати хабар қилди.
Қайд этилишича, Норов элчини янги лавозимга тайинлангани билан табриклаган ва дипломатик миссиясида муваффақиятлар тилаган. Томонлар кейинги йилларда ривожланишнинг сифат жиҳатидан янги босқичига кўтарилган Ўзбекистон—Испания ҳамкорлигининг долзарб масалаларини муҳокама қилган.
Сиёсий мулоқотни фаоллаштириш, турли даражадаги ташрифлар ташкил этиш, халқаро институтлар доирасида ўзаро ҳамкорликни кучайтириш, Афғонистон масаласи бўйича маслаҳатлашувларни давом эттириш муҳимлиги қайд этилган.
Маркос Гомес Мартинес Испания Ўзбекистонни минтақадаги асосий давлат деб билишини ва республикада амалга оширилаётган, аҳоли фаровонлигини ошириш ва мамлакатнинг жаҳон миқёсидаги нуфузини оширишга хизмат қилаётган тизимли ислоҳотларни ҳар томонлама қўллаб-қувватлашини таъкидлаган.
Иқтисодий дипломатияни фаоллаштириш истиқболларига алоҳида эътибор қаратилган. Испания томони Ўзбекистон билан транспорт, қишлоқ хўжалиги, банк иши, тўқимачилик ва нефть-газ саноати, қайта тикланадиган энергия ва туризм соҳаларида узоқ муддатли ҳамкорликни йўлга қўйишдан манфаатдор экани қайд этилган.
Элчи испан компаниялари учун Ўзбекистон катта имкониятларга эга истиқболли бозор эканини маълум қилган. Мамлакат ва унинг ишбилармонлик муҳитини батафсил ўрганиш учун Испания тадбиркорлик субъектлари делегациясининг Ўзбекистонга ташрифини ташкил этиш режалаштирилган.
Таълим соҳасидаги алоқаларни ривожлантириш учун етарли салоҳият мавжудлиги таъкидланган. Хусусан, Ўзбекистонда Испания университетларининг филиаллари ва касб-ҳунарга ўқитиш марказларини очиш, испаниялик мутахассислар ва ўқитувчиларни мамлакатга жалб этиш масалалари муҳокама қилинган.
Бундан ташқари, шу куни Ташқи ишлар вазирлигида Президентнинг Афғонистон бўйича Махсус вакили Исматилла Эргашев ва Испания элчиси Маркос Гомес Martinez ўртасида учрашув бўлиб ўтган.
Суҳбат давомида томонлар Афғонистондаги мавжуд вазиятни ва бу мамлакатга ёрдам кўрсатиш масалаларини муҳокама қилган.
Изоҳ (0)