Ўзбекистон тижорат банкларида доллар курси февраль охиридан бери илк бор 10 900 сўмга қадар тушиб кетди

Ўзбекистондаги бир нечта тижорат банклари 23 июнь, пайшанба куни доллар валютасининг сўмга нисбатан курсини 10 900 сўмга қадар туширди. Бу февраль охиридан буён қайд этилган энг минимум кўрсаткич.

Аксарият банклар 1 АҚШ долларини 10 900 сўмдан сотиб олишни, 10 795-10 870 оралиғида сўмга сотишни таклиф қилмоқда. Тижорат банкларида доллар курси биринчи марта 11 март куни 11 минг сўмдан ошиб кетганди. Марказий банк хорижий валюталарнинг ўзбек сўмига нисбатан 23 июндан амалда бўладиган қийматини белгилаган. Унга кўра, долларнинг расмий курси 10 847,08 сўмни ташкил қилмоқда.

Қуйида долларнинг янги қийматини эълон қилган айрим банклар келтирилган:

• NBU: сотиб олиш — 10 840 сўм, сотиш — 10 900 сўм;
• «Ҳамкорбанк»: сотиб олиш — 10 870 сўм, сотиш — 10 900 сўм;
• «Даврбанк»: сотиб олиш — 10 830 сўм, сотиш — 10 900 сўм;
• «Туронбанк»: сотиб олиш — 10 830 сўм, сотиш — 10 900 сўм;
• «Тенгебанк»: сотиб олиш — 10 840 сўм, сотиш — 10 900 сўм;
• «Капиталбанк»: сотиб олиш — 10 850 сўм, сотиш — 10 900 сўм.

Доллар курси март ойида кескин кўтарилиб кетганди — ўшанда 10—17 март кунлари давомида ҳар куни рекорд кўрсаткичлар қайд этилганди. Жумладан, 14 март куни банклар доллар курсини 50 сўмга кўтарган бўлса, 18 мартда бирданига 240 сўмга ошиб кетганди.