Дзюдо ҳамда қўл жанги спорт турларини ривожлантириш бўйича президент қарорлари қабул қилинди. Бу ҳақда Telegram’даги «Ҳуқуқий ахборот» канали хабар қилди.
Қарорга кўра, 2023 йил 1 январдан анъанавий тарзда дзюдо спорт тури бўйича Ўзбекистонда қуйидаги мусобақалар ўтказилади:
- катталар ўртасида «Катта дубулға» халқаро турнири;
- мактаб ўқувчилари ўртасида «Халқ таълими вазири кубоги»;
- ўрта махсус, профессионал ва олий таълим муассасалари ўқувчи-талабалари ўртасида «Олий ва ўрта махсус таълим вазири кубоги»;
- 2024—2025 йилларда ҳарбийлар ўртасида Жаҳон чемпионати.
- Шунингдек, 2023 йил 1 январдан Спортни ривожлантириш вазирлиги тизимига кирувчи Денов ҳамда Урганч дзюдо спорт маҳорати мактаблари (дзюдо мактаблари) давлат спорт-таълими муассасаси сифатида ташкил этилади.
2023 йил 1 январдан:
- умумий ўрта таълим мактабларида дзюдо спорт турини ривожлантириш бўйича «Болалар учун дзюдо» дастури;
- мактабгача таълим ташкилотларида «Мактабгача дзюдо» лойиҳаси жорий қилинади.
«Болалар учун дзюдо» дастури доирасида қуриб фойдаланишга топширилган дзюдо залларида Ўзбекистон дзюдо федерацияси ҳузуридаги Дзюдо спорт клубининг филиаллари ташкил этилади. Ўзбекистон Миллий университетида 2022/2023-ўқув йилидан «Дзюдо ва спорт фаолияти» бакалавриат таълим йўналиши очилади. Спортни ривожлантириш вазирлиги тизимида Ўзбекистон дзюдо академияси ташкил этилади.
Шунингдек, 2023 йилдан анъанавий тарзда қўл жанги спорт тури бўйича:
- ҳар йили Тошкент шаҳрида 14 январь ‒ Ватан ҳимоячилари кунига бағишланган Қуролли Кучлар чемпионати ҳамда ўз хизмат вазифасини бажариш чоғида қаҳрамонлик ва жасорат кўрсатиб, ҳалок бўлган ҳарбий хизматчилар ва ходимлар хотирасига бағишланган Хотира турнири ташкил этилади;
- ҳар йили Наманган шаҳрида профессионал спортчилар ўртасида «Ўзбекистон Республикаси президенти кубоги» халқаро турнири ўтказилади;
- ҳар икки йилда бир маротаба Қарши, Самарқанд ва Бухоро шаҳарларида ёшлар ўртасида «Амир Темур кубоги» халқаро турнири ўтказилади.
Изоҳ (0)