Ижтимоий тармоқларда Фарғонада фуқаролар ўртасида катта жанжал бўлгани акс этган видео тарқалди. Мазкур ҳолат юзасидан Фарғона вилоят ИИБ ахборот хизмати «Дарё»га расмий маълумот берди.
Маълум қилинишича, 2022 йилнинг 13 май куни Фарғона шаҳар Абдураҳмон Жомий кўчаси 16-уй 27-хонадонда яшовчи фуқаро М.А. 102 қисқа рақамига мурожаат қилиб, унга таниш бўлган Ф. ва У. исмли фуқаролар уни урганлигини айтиб, қонуний чора кўришни сўраган.
Терговга қадар текширув давомида фуқаро М.А. ўзининг алабай итини ушбу кўп қаватли уйнинг орқа тарафига боғлаб қўйганлиги, Фарғона шаҳар Озодлик кўчаси 27-уйда яшовчи фуқаро С.С. бу ҳолатга эътироз билдирганлиги ва оқибатда ўртада низо келиб чиққани аниқланган. Оғзаки тортишув жанжалга айланган ва С.С. М.А.ни уриб, тан жароҳати етказган.
Ушбу кўп қаватли уйда яшовчи фуқаролар М.А. ва С.С. ўртасидаги жанжалнинг олдини олишга ҳаракат қилган.
Мазкур ҳолат юзасидан М.А.га нисбатан Маъмурий жавобгарлик тўғрисидаги кодекснинг 183-модда (майда безорилик) ва 41-моддаси (ҳақорат қилиш) билан, фуқаро И.Р.га нисбатан 41-модда ва 183-моддалари билан, фуқаро С.С.га нисбатан 41-моддаси ва 52-моддаси 2-қисми ҳамда 183-моддаси билан, фуқаро Ф.С.га нисбатан эса 183-моддаси билан ҳужжатлар расмийлаштириб, жорий йилнинг 24 май куни жиноят ишлари бўйича Фарғона шаҳар судига юборилган.
Фуқаро М.А.нинг мурожаатига асосан ЖИБ Фарғона шаҳар суди томонидан ушбу ҳужжатлар ўрганиб чиқиш учун Фарғона шаҳар прокуратурасига юборилган.
Изоҳ (0)